Ֆուտբոլի Հայաստանի փոխչեմպիոն «Նոան» հյուսիսմակեդոնական «Շկենդիայի» դեմ Կոնֆերենցիաների լիգայի որակավորման առաջին փուլի առաջին մրցավեճում առավելությամբ խաղաց և հաղթեց 2-0 հաշվով:

Աբովյանի Վահագն Թումասյանի անվան ստադիոնում կայացած խաղի հաշիվը բացվեց 81-րդ րոպեին։ Գոլի հեղինակ դարձավ պորտուգալացի հարձակվող Գոնշալու Գրեգորիուն, որը «Նոայի» կազմում նորամուտը նշեց: Գոլի դրվագում «Նոայի» ֆուտբոլիստները եզրային նետումը տուգանայինի նման խաղարկեցին և Գրեգորիուն գլխի հարվածով գնդակը մխրճեց մրցակցի դարպասը: Պորտուգալացին  փոխարինման էր դուրս եկել 76-րդ րոպեին:

«Նոան» 90-րդ րոպեին անկյունայինի խաղարկումից հետո նաև երկրորդ գոլը խփեց, դարպասի գրավմամբ աչքի ընկավ սերբ պաշտպան Ալեքսանդր Միլկովիչը:

Սա «Նոայի» առաջին հանդիպումն էր պորտուգալացի մասնագետ Ռուի Մոտայի գլխավորությամբ:

Դիմակայության պատասխան խաղը տեղի կունենա հուլիսի 18-ին Հյուսիսային Մակեդոնիայում։ «Շկենդիայի» արգելքը հաղթահարելու դեպքում «Նոան» երկրորդ փուլում կխաղա Մալթան ներկայացնող «Սլիմա Ուոնդերերսի» հետ։

Կոնֆերենցիաների լիգա, որակավորման առաջին փուլ, առաջին խաղ

«Նոա» (Հայաստան) - «Շկենդիա» (Հյուսիսային Մակեդոնիա)՝ 2-0

Գոնշալու Գրեգորիու, 81, Ալեքսանդր Միլկովիչ, 90