«Տոտենհեմի» գլխավոր մարզիչ Անտոնիո Կոնտեն խոստովանել է, որ կարող է լոնդոնյան ակումբից հեռացվել մինչև ընթացիկ մրցաշրջանի ավարտը:
«Ես պայմանագիր ունեմ «Տոտենհեմի» հետ, մրցաշրջանի վերջում մենք ակումբի հետ կորոշենք, թե ինչ կլինի հետո։ Պայմանագիրս ավարտվում է հունիսին: Ինձ կարող են հեռացնել մինչև մրցաշրջանի ավարտը: Միգուցե սպասելիքներն ավելի մեծ էին և կա հիասթափություն:
Մարզիչի համար ամենակարևորն աշխատելն ու նշաձողը բարձրացնելն է։ Այս տարի մենք պայքարում ենք դա անելու համար»,- իտալացի մասնագետի խոսքը մեջբերում է The Guardian-ը։
Հիշեցնենք, որ Կոնտեն 2021 թվականի նոյեմբերից է գլխավորում անգլիական ակումբը: «Տոտենհեմը» մարտի 8-ին դուրս էր մնացել Չեմպիոնների լիգայից: Գլխավոր եվրագավաթի 1/8 եզրափակիչի պատասխան խաղում «Տոտենհեմն» ու Իտալիայի չեմպիոն «Միլանը» գրանցել էին գոլազուրկ ոչ-ոքի, առաջին մրցավեճում Կոնտեի թիմը պարտվել էր 0-1 հաշվով:
