Լևոն Խոզյանն ու իր թիմը ֆրանսիական «The Voice»-ի եզրափակիչում են: Կիսաեզրափակիչում «Il Cello» խումբը կատարեց Ջոշ Գրոբանի «You Raise Me Up» երգը։ Ելույթի սկզբում Լևոնը կրկին դուդուկ նվագեց։ Նրանց թիմի ղեկավար Ֆլորեն Պանին հիացած էր տղաների կատարմամբ։ «Ես ունեմ 3 ֆանտաստիկ ձայն և 3 ֆանտաստիկ երգիչ։ Երեքն էլ հիանալի միաձուլվում են և շատ ներդաշնակ են։ Ասեմ ավելին՝ նրանք նաև շատ գեղեցիկ տղաներ են», - խոստովանեց Պանին:

«Il Cello» խումբը ձևավորել է Ֆլորեն Պանին։ Ֆրանսիացի արտիստ, ով «The Voice» վերադարձավ քաղցկեղի դեմ երկարատև բուժումից հետո։ Նա այս նախագծում հաղթել է 5 անգամ։ Խմբային փուլում Պանին նորարարություն արեց և անհատներից ձևավորեց խումբ, քանի որ չէր կողմնորոշվում՝ Լևոն, Սեբաստիան և Սալվադորե եռյակից ում թողնել, ում հեռացնել։ Նման բան «The Voice»-ում երբեք չէր եղել։
«Il Cello»-ի (իտալերեն՝ թավջութակ, - հեղ․) տղաները մի քանի շաբաթ միասին աշխատեցին և մասնակցեցին «Battles» փուլին։ Այստեղ Թեդուլի հետ կատարեցին «Queen»-ի «Who Wants to Live Forever» երգն ու անցան կիսաեզրափակիչ։

Լևոնը Մարսելից է։ Իրեն «փոփ-լիրիկական» երգիչ համարող Լևոնը կույր լսումներին բոլորին զարմացրեց՝ նվագելով հայկական ավանդական դուդուկ։ Ապա կատարեց «France Gall»-ի «Evidemment» երգը։

Սալվադորեն մասնագիտությամբ ռեստորատոր է։ 2024 թվականի գարնանը նա եղել է «Culturebox»-ով հեռարձակվող «Գտիր քո ձայնը» երաժշտական ​​իրականության մասին առաջին վավերագրական ֆիլմաշարի 13 մասնակիցներից։ Կույր լսումներին Սալվադորեն բոլորին ապշեցրեց բրիտանական «Procol Harum» ռոք խմբի «Senza Luce» երգով։

Եռյակի երրորդ անդամը  բելգիացի Սեբաստիանն է։ Նա ուսուցիչ է, աշխատում է դպրոցում։ Կույր լսումներին նա մարզիչներին հիացրեց՝ կատարելով «Les Misérables»-ի սաունդթրեքից «I Dreamed a Dream»-ը։ Սեբստիանը նման նախագծերի մեծ փորձ ունի։ 2014-ին մասնակցել է բելգիական «The Voice»-ին: 2 տարի առաջ էլ նա նաև հասել էր «À la recherche du nouveau Claude François» շոուին և հասել եզրափակիչ։