UFC-ի թեթև քաշային կարգում գործող չեմպիոն Իսլամ Մախաչևը կարծում է, որ հայ մարտիկ Արման Ծառուկյանը պետք է շնորհակալություն հայտնի իրեն.
«Ինձ համար չէին կարողանում մրցակից գտնել։ Կարծում եմ` Ծառուկյանը պետք է շնորհակալություն հայտնի ինձ, քանի որ իմ միջոցով նրա հետ պայմանագիր կնքեց UFC-ին։ Այդ պահին ես բացարձակ չէի ճանաչում Արմանին, ծանոթ չէի նրա ոճին և չէի դիտել նրա մասնակցությամբ մենամարտերը»,- մեջբերում է UFC-ի մամուլի ծառայությունը։
27-ամյա Ծառուկյանը UFC-ի հովանու ներքո առաջին մենամարտը 2019 թ. ապրիլի 20-ին անցկացրել է հենց Մախաչևի դեմ` պարտվելով մրցավարների միաձայն որոշմամբ։
Մախաչևն այժմ պատրաստվում է հունիսի 2-ին UFC 302 մրցաշարում Դասթին Պորյեի (ԱՄՆ) դեմ կայանալիք մենամարտին։ Հաղթելու դեպքում նա, ամենայն հավանականությամբ, հաջորդ մենամարտն անցկացնելու է Ծառուկյանի դեմ։ Ծառուկյանը բրազիլացի Չարլզ Օլիվեյրային հաղթելուց հետո դարձել է թեթև քաշային կարգի դասակարգման առաջատարը։
