Անգլիական «Մանչեսթեր Սիթիի» արգենտինացի կիսապաշտպան Կլաուդիո Էչևերին 2025/26 մրցաշրջանը վարձավճարով կանցկացնի Լևերկուզենի «Բայերում», հաղորդում է ակումբի մամուլի ծառայությունը:
19-ամյա ֆուտբոլիստը գերմանական գրանդում կխաղա «9» համարի մարզաշապիկով:
«Հիանալի է ինձ համար հաջորդ քայլերը կատարել 2024 թվականի Գերմանիայի չեմպիոնների հետ, որոնք այժմ Բունդեսլիգայում և Չեմպիոնների լիգայում են: Ես ուզում եմ շատ րոպեներ անցկացնել խաղադաշտում և շաբաթ առ շաբաթ զարգանալ՝ դառնալով ավելի լավ խաղացող: «Բայերում» շատ երիտասարդ խաղացողներ հասել են իրենց գագաթնակետին: Ես ուզում եմ այդ ճանապարհով գնալ գալիք մրցաշրջանում»,- ասել է արգենտինացին տեղափոխությունից հետո:
Էչևերին 2024 թվականի հունվարին էր արգենտինական «Ռիվեր Փլեյթից» տեղափոխվել անգլիական գրանդ, սակայն վարձավճարով վերադարձել էր իր նախկին թիմ: Նա «Ռիվեր Փլեյթում» խաղացել էր մինչև նախորդ տարվա ավարտը, ԱՄՆ-ում կայացած աշխարհի ակումբային առաջնությունում իր առաջին գոլն էր խփել «Մանչեսթեր Սիթիի» կազմում:
«Բայերը» հայտարարել է նաև ֆրանսիացի պաշտպան Լոյիկ Բադեի տրանսֆերի մասին: Նա անդալուզական «Սևիլիայից» է տեղափոխվել գերմանական ակումբ, պայմանագիրը նախատեսված է մինչև 2030 թվականի հուլիսի 1-ը: 25-ամյա ֆուտբոլիստը կխաղա «5» համարով:
