Տիգրան Պետրոսյանի անվան շախմատի տանն ընթացող Հայաստանի Բարձրագույն խմբի տղամարդկանց առաջնության 6-րդ տուրն աչքի ընկավ պարտիաների աննախադեպ արդյունավետությամբ: Բոլոր 6 մրցախաղերն էլ ավարտվեցին մրցակիցներից մեկի հաղթանակով:
Ուշադրության կենտրոնում մրցաշարի առաջատար Մանուել Պետրոսյանի և գործող չեմպիոն Հովհաննես Գաբուզյանի մրցախաղն էր: 3-րդ անընդմեջ հաղթանակը տոնելով, Մանուել Պետրոսյանը 4,5 միավորով շարունակում է միանձնյա գլխավորել մրցաշարային աղյուսակը:
4-ական միավորով առաջատարին հետապնդում են Շանթ Սարգսյանը և Սամվել Տեր-Սահակյանը, որոնք պարտության մատնեցին համապատասխանաբար Արման Միքայելյանին ու Տիգրան Պետրոսյանին:
Առաջին պարտությունները կրեցին Հայկ Մարտիրոսյանն ու Արման Փաշիկյանը, որոնք խաղում էին համապատասխանաբար Տիգրան Հարությունյանի և Դավիթ Շահինյանի հետ: Զավեն Անդրիասյանն էլ առավելության հասավ Մամիկոն Ղարիբյանի նկատմամբ:
