Թուրքիայում շարունակվում է մարզական միջոցառումների վրա խաղացողների և մրցավարների կողմից խաղադրույքներ կատարելու վերաբերյալ խոշոր սկանդալի հետաքննությունը, տարբեր դիվիզիոններից ավելի քան 1000 ֆուտբոլիստ որակազրկվել է, նրանցից 27-ը խաղում են Սուպերլիգայի ակումբներում, հաղորդում է Marca-ն:
Որակազրկված ֆուտբոլիստներ կան նույնիսկ չեմպիոն «Գալաթասարայից», «Բեշիկթաշից», «Տրաբզոնսպորից» և «Անթալյասպորից»:
Թուրքիայի ֆուտբոլի ֆեդերացիան բանակցություններ է սկսել ՖԻՖԱ-ի հետ լրացուցիչ տրանսֆերային պատուհանի վերաբերյալ, քանի որ երկրորդ ու երրորդ դիվիզիոնների շատ ակումբներ չեն կարողանում համալրել իրենց կազմերը խաղերի համար: Երկրորդ ու երրորդ դիվիզիոնները ներկայումս ժամանակավորապես դադարեցված են:
Նախկինում հետաքննությունների արդյունքում պատժվել է 149 մրցավար, իսկ ավելի քան 40 խաղի պատվիրակներ ստիպված են եղել հեռանալ աշխատանքից: Թուրքիայի ֆուտբոլի ֆեդերացիայի հետաքննությունից հետո դատախազությունը նախնական կալանք է պահանջել 17 մրցավարի և մեկ մարզական լրագրողի համար: Գործով ևս 11 մեղադրյալներ ազատ են արձակվել գրավի դիմաց:
