Fastex Պրեմիեր լիգայի 28-րդ տուրում «Նոան» 19-րդ անընդմեջ հաղթանակը տոնելով, ևս մեկ վստահ քայլ կատարեց չեմպիոնի տիտղոսը ժամկետից շուտ նվաճելու ճանապարհին:

FastNews-ը տուրի ամենաուշագրավ իրադարձությունները ներկայացնում է 10 փաստի տեսքով:

1. Տուրն անցավ հյուրերի առավելությամբ, որոնք 2 հաղթանակ տոնեցին, նույնքան խաղ ավարտեցին ոչ-ոքի, կրեցին մեկ պարտություն: Դաշտի տերերից միակ հաղթանակը տարավ «Նոան»: Առաջնությունում կայացած 137 հանդիպումներից 57-ում հաղթել են դաշտի տերերը, 58-ում հաջողությունն ուղեկցել է հյուրերին, 22 խաղում էլ գրանցվել է ոչ-ոքի:

Կայացած 5 հանդիպումներում խփվեց 12 գոլ (միջինը մեկ խաղում՝ 2,4 գոլ): Առաջնության 137 հանդիպումներում գրանցվել է 418 գոլ (միջինը մեկ խաղում՝ 3,05 գոլ):

2. «Արարատ-Արմենիան» ընթացիկ առաջնությունում 5-րդ անընդմեջ հաղթանակը տոնեց, որից 3-ը՝ խոշոր հաշվով: Խաղերից 4-ում գործող գավաթակիրը 3-ական գոլ է խփել, իսկ «Գանձասարի» դարպասը 4 անպատասխան գնդակ է ուղարկել:

Կապանցիների հետ անցկացրած 3 խաղերում էլ Վարդան Մինասյանի գլխավորած թիմը հաղթել է խոշոր հաշվով՝ ընդհանուր առմամբ մրցակցի դարպասը խփելով 10 անպատասխան գնդակ: Ընթացիկ առաջնությունում «Արարատ-Արմենիան» խոշոր հաշվով 8-րդ հաղթանակը տոնեց: Թիմի համար ռեկորդային է 2022/23թթ. մրցաշրջանը, որում Հայաստանի կրկնակի չեմպիոնը խոշոր հաշվով 10 հաղթանակ է տարել:

3. «Արարատի» նկատմամբ տարած հաղթանակը 22-րդն էր «Նոայի» համար ընթացիկ առաջնությունում: Ռուի Մոտան թիմը գլխավորած 12 մարզիչների մեջ դարձավ ռեկորդակիր ՀՀ առաջնություններում տարած հաղթանակների քանակով: Նա գերազանցեց Կառլոս Ինարեխոսի ռեկորդային ցուցանիշը, որի գլխավորությամբ «Նոան» նախորդ առաջնության 27 հանդիպումներում 21 հաղթանակ էր տարել: Եռյակը եզրափակում է Իգոր Պիկուշչակը, որի օրոք անցկացրած 43 խաղերում «Նոան» 19 հաղթանակ է տոնել:

4. «Շիրակն» ընդհատեց առաջնությունում 3 անընդմեջ պարտությունների շարքը: Գյումրիում անցկացրած վերջին 4 խաղերում շիրակցիներն առաջին միավորը վաստակեցին: Սեփական դաշտում անցկացրած վերջին 5 հանդիպումներում «Շիրակն» ընդամենը 2 միավոր է վաստակել:

5. Գոնսալու Գրեգորիուն առաջնությունում 20-րդ գոլը խփեց: Նախորդ առաջնության 25 հանդիպումներից հետո լավագույն ռմբարկուների ցանկը գլխավորող Արթուր Միրանյանի հաշվին 17 գոլ էր գրանցված: Հիշեցնենք, որ վերջինս 23 գնդակով դարձել էր նախորդ առաջնության լավագույն ռմբարկուն: Միրանյանն այդ ցուցանիշով նաև Fastex Պրեմիեր լիգայում «Նոայի» պատմության գլխավոր ռմբարկուն է:

6. Մարիուս Նուբիսին շարունակեց արդյունավետ խաղերի իր շարքը՝ պաշտոնական վերջին 7 հանդիպումներում 10 անգամ գրավելով մրցակիցների դարպասները: Խաղերից 5-ը կայացել է առաջնությունում, որոնցում կամերունցի ֆուտբոլիստը 7 գոլ է խփել: Նուբիսին 15 գոլով «Արարատ-Արմենիայի» լավագույն ռմբարկուն է:

7. Էրալդ Չինարին ընթացիկ առաջնությունում 14-րդ գոլը խփեց ու եզրափակեց լավագույն ռմբարկուների եռյակը: Առաջնության վերջին 4 հանդիպումներում Չինարին 3 գոլի հեղինակ է դարձել:

8. Բրունո Միշելի խփած գնդակն «Ուրարտուի» հոբելյանական՝ 150-րդ գոլն էր «Շիրակի» հետ ՀՀ առաջնություններում անցկացրած հանդիպումներում: Բրազիլացի ֆուտբոլիստն առաջնությունում անցկացրած 7 հանդիպումներում արդեն 6 գոլ է խփել:

9. Ալեքսեյ Պլոշադնին 2-րդ անընդմեջ խաղում դարպասն անառիկ պահեց: Ընթացիկ առաջնությունում «Նոայի» դարպասապահը 9-րդ «չոր» խաղն անցկացրեց, ինչը լավագույն ցուցանիշն է Հենրի Ավագյանի հետ: Վերջինս 6 անգամ դարպասն անառիկ է պահել «Փյունիկում», 3 անգամ՝ «Արարատ-Արմենիայում»:

Պլոշադնին առաջնության աշնանային հատվածում 6 խաղ անընդմեջ, 616 րոպե շարունակ դարպասն անառիկ էր պահել, ինչը ռեկորդային ցուցանիշ է ընթացիկ մրցաշրջանում:

10. Միքայել Միրզոյանը Fastex Պրեմիեր լիգայում հոբելյանական՝ 100-րդ խաղն անցկացրեց: Դրանցից 32-ին նա մասնակցել է «Ուրարտուի» կազմում: