Մայամիում ներկով փչացրել են աշխարհի նորընծա չեմպիոն Արգենտինայի հավաքականի ավագ, ամերիկյան «Ինտեր Մայամիի» նորեկ Լիոնել Մեսիի պատկերով որմնանկարը, հայտնում է Marca-ն:
Չարագործության մեջ կասկածվում են «Օռլանդո Սիթիի» ֆանատները, որոնք վատ հարաբերություններ ունեն «Ինտեր Մայամիի» երկրպագուների հետ։
Հիշեցնենք, որ 36-ամյա ֆուտբոլիստը «Ինտեր Մայամիում» նորամուտը նշել էր «Կրուս Ազուլի» դեմ խաղում (2-1), փոխարինման էր մտել 54-րդ րոպեին և տուգանայինից խփել առաջին գոլը նոր թիմի կազմում։ «Ոսկե գնդակի» 7-ակի դափնեկիրը դուբլի և գոլային փոխանցման հեղինակ էր դարձել «Ատլանտայի» դեմ Լիգաների գավաթի խաղարկության խմբային փուլի երկրորդ տուրում (4-0):
Նախորդ մրցաշրջանը Մեսին անցկացրել էր Ֆրանսիայի չեմպիոն ՊՍԺ-ի կազմում և 40 խաղում դարձել էր 21 գոլի և 20 գոլային փոխանցման հեղինակ:
