Աշխարհի 14-րդ ռակետ Մեդիսոն Քիզը կարիերայում 11-րդ փորձից դարձավ «Մեծ սաղավարտի» տարվա առաջին մրցաշար Ավստրալիայի բաց առաջնության կանանց մենախաղի հաղթող։
Եզրափակիչում ամերիկացի թենիսիստուհին 6-3, 2-6, 7-5 հաշվով հաղթեց աշխարհի առաջին ռակետ Արինա Սաբալենկային (Բելառուս)։ Մրցախաղը տևեց 2 ժամ 4 րոպե։
29-ամյա Քիզը կարիերայում առաջին անգամ նվաճեց «Մեծ սաղավարտի» մրցաշարի տիտղոս, որը հաղթելուց հետո նա չկարողացավ զսպել հուզմունքը, գրկեց ամուսնուն ու արտասվեց: Քիզը WTA-ի դասակարգման աղյուսակում վաստակեց 2000 միավոր և հերթական թարմացումից հետո կբարձրանա 7-րդ տեղ ու կկրկնի կարիերայի լավագույն արդյունքը։
«Համբերատար եղեք, քանի որ ես լաց եմ լինելու: Առանց արցունքների հնարավոր չէ: Նախ՝ Արինա, հիանալի թենիս էր: Ուրախ եմ, որ վերջում կարողացա քեզ հանդիպել: Անհավանական էր: Միշտ այնքա՜ն բարդ է քո դեմ խաղալը: Շնորհավորում եմ քեզ ու քո թիմին հերթական հիանալի ելույթի համար:
Շնորհակալ եմ բոլոր նրանց, ովքեր եկել են տրիբունաներ ու աջակցում էին ինձ: Այստեղ ես միշտ զգացել եմ ինչպես տանը: «Մեծ սաղավարտում» իմ առաջին կիսաեզրափակիչը եղել է այստեղ, այստեղ է նաև առաջին տիտղոսս, իսկ դա ինձ համար մեծ նշանակություն ունի:
Շնորհակալ եմ իմ թիմին... Հիմա լաց եմ լինելու: Հենց սա՛ էի ուզում այսքան ժամանակ: Մեկ անգամ արդեն խաղացել էի եզրափակիչում, չկարողացա հաղթել: Չգիտեի՝ արդյոք երբևէ կկարողանայի՞ տիտղոսը նվաճել: Բայց իմ թիմը միշտ հավատացել է ինձ, ու ես շնորհակալ եմ: Նրանք հավատում էին ինձ նույնիսկ այն ժամանակ, երբ ես էի կորցնում հավատը: Նախորդ տարին ծանր էր ինձ համար, վնասվածքներով. չգիտեի՝ արդյոք երբևէ կկարողանա՞մ սա անել: Լինել այստեղ, բարձրացնել գավաթը, անել դա ամուսնուս հետ... Նա շոկի ու շփոթության մեջ է հիմա... Ես քեզ շատ եմ սիրում:
Հիմա ես էլ եմ ապշած ու շփոթված: Շնորհակալ եմ, շնորհակալ եմ բոլոր նրանց, ովքեր ինձ հավատացել են ու շարժվել դեպի իմ երազանքը: Շնորհակալ եմ»,- ասել է Քիզը մրցանակաբաշխության ժամանակ:
Սաբալենկան Australian Open-ի նախորդ երկու տարիների հաղթողն էր: Մրցաշարում ընդհատվեց նրա` 20 անընդմեջ հաղթանակից բաղկացած շարքը։ Բելառուս թենիսիստուհին վաստակեց 1300 միավոր և կշարունակի գլխավորել դասակարգման աղյուսակը։
