Լիսաբոնի «Սպորտինգի» հարձակվող Պեդրու Գոնսալվեշը և Լոնդոնի «Չելսիի» վինգեր Պեդրու Նետուն չեն միանա Պորտուգալիայի ազգային հավաքականին, հաղորդում է Պորտուգալիայի ֆուտբոլի ֆեդերացիան:
Գոնսալվեշը մկանային վնասվածք է ստացել Պորտուգալիայի առաջնության խաղում, իսկ Նետուի չմիանալու պատճառի վերաբերյալ տեղեկություն չկա: Ռոբերտո Մարտինեսը որոշել է նրանց չփոխարինել. Ազգերի լիգայի հաղթողները 24 ֆուտբոլիստով կպատրաստվեն Իռլանդիայի և Հայաստանի հավաքականների դեմ խաղերին:
Պորտուգալացիները նոյեմբերի 13-ին աշխարհի 2026 թվականի առաջնության եվրոպական գոտու ընտրական մրցաշարի F խմբի նախավերջին խաղում կհյուրընկալվեն Իռլանդիայի հավաքականին, իսկ 3 օր անց կընդունեն Հայաստանի ազգային թիմին:
Պորտուգալիայի հավաքականը 10 միավորով խմբի առաջատարն է, ևս 1 միավոր վաստակելու դեպքում Մարտինեսի թիմը կնվաճի Մունդիալի ուղեգիր:
ԱԱ-2026-ի եվրոպական գոտու ընտրական մրցաշարի հանդիպումները ցուցադրվում են «Ֆասթ Սպորտ» հեռուստաալիքների («Ֆասթ Սպորտ», «Ֆասթ Սպորտ 1», «Ֆասթ Սպորտ 2») ուղիղ եթերում: Բոլոր խաղերը հեռարձակվում են Fast TV հավելվածում (iOS, Android):
