Հունվարի 15-ին 84 տարեկանում մահացավ կինոդերասան և երգիչ Վախթանգ Կիկաբիձեն: Մահվան մասին տեղեկությունը հաստատել է նրա պրոդյուսեր Ռատի Աբզիանիձեն։
«Բոլորը գիտեն, որ նա երկար տարիներ առողջական խնդիրներ ուներ, և դա իր ազդեցությունը թողեց: Ես ուզում եմ շնորհակալություն հայտնել կլինիկային, որտեղ նա գտնվում էր մի քանի շաբաթ: Շնորհակալություն եմ հայտնում բժիշկներին և անձնակազմին, որոնք արել են ամենը, ինչ կարող էին, բայց, ցավոք, մենք անզոր գտնվեցինք, սա մեծ կորուստ է բոլորի համար»,- լրագրողներին ասել է նա։
Կիկաբիձեի գլխավոր դերերը
Վախթանգ Կիկաբիձեն ծնվել է 1938 թվականի հուլիսի 19-ին Թբիլիսիում։ Դպրոցից հետո սովորել է Թբիլիսիի օտար լեզուների պետական ինստիտուտում, իսկ 1959 թվականին դարձել Թբիլիսիի ֆիլհարմոնիայի արտիստ։ 1960-ականների կեսերին նա ելույթ է ունեցել «Դիելո» և «Օրերա» ջազային անսամբլների հետ՝ կատարելով վրացերեն, ռուսերեն, իտալերեն և անգլերեն երգեր։
1966 թվականին Կիկաբիձեն իր դեբյուտն ունեցավ կինոյում՝ նկարահանվելով Նիկոլայ Սանիշվիլիի «Հանդիպում լեռներում» ֆիլմում, սակայն երեք տարի անց հայտնի դարձավ Գեորգի Դանելիայի «Մի վշտանա» կատակերգությունում Բենջամեն Գլոնտիի դերով։
Կիկաբիձեն նկարահանվել է բազմաթիվ ֆիլմերում՝ «Ես քննիչ եմ», «Վերիյսկի թաղամասի մեղեդիները», «Կորած արշավախումբը», «ՏԱՍՍ-ը լիազորված է հայտարարել»։ Նա համամիութենական համբավ ունեցավ Դանելիայի «Միմինո» (1977) ֆիլմից հետո, որտեղ մարմնավորեց վրացական փոքրիկ գյուղից մի օդաչուի, որը երազում էր թռչել մեծ ինքնաթիռներով։
Կիկաբիձե-Ֆրունզիկ ընկերները
Վախթանգ Կիկաբիձեն՝ իր ընկերոջ և կոլեգայի մասին.
Մարդը...
2008 թվականին ռուս-վրացական հակամարտությունից հետո Կիկաբիձեն հետաձգեց Մոսկվայի իր հոբելյանական համերգները, մի քանի սուր հայտարարություններ արեց Ռուսաստանի հասցեին և այլևս մուտք չգործեց Ռուսաստանի տարածք: Բայց չնայած իր քաղաքական հայացքներին՝ արտիստի երգացանկը հարուստ է ռուսերեն երգերով։
«Ես իմ էությամբ երևի ինտերնացիոնալիստ եմ, քանի որ միշտ համարել եմ, որ ազգությունը հորինված անուն է։ Պարզապես մեկը խոսում է մի լեզվով, մյուսն` այլ: Մեկ գլուխ, երկու ձեռք, երկու ոտք․․․»,- ասել է Կիկաբիձեն:
