Փարիզի ՊՍԺ-ի և Արգենտինայի հավաքականի առաջատար Լիոնել Մեսին խոսել է այն մասին, թե արդյոք Կատարում կայացած աշխարհի առաջնությունից հետո խնդիր ունի իր ակումբակից, Ֆրանսիայի հավաքականի հարձակվող Կիլիան Մբապեի հետ:
«Այո, մենք խոսեցինք խաղի մասին, տոնակատարության մասին, այն մասին, թե ինչպես էին մարդիկ ապրում Արգենտինայում այդ օրերին, երբ ես արձակուրդում էի: Եվ ոչինչ, ոչ ավելին, բայց ամեն ինչ լավ է, շատ լավ։
Դժվար է եզրափակիչի մասին խոսել պարտվողի հետ։ Ես նույնիսկ չեմ ուզում կենտրոնանալ դրա վրա, բարձրացնել եզրափակիչի թեման։ Ես չէի ուզում քննարկել որևէ բան, որը կապ ունի նաև աշխարհի առաջնության հետ: Բայց ես իրականում խնդիր չունեմ Կիլիանի հետ, ճիշտ հակառակը»,- աշխարհի չեմպիոնը հայտնել է Ole-ին:
Հիշեցնենք, որ աշխարհի առաջնության եզրափակիչում Ֆրանսիայի հավաքականին հետխաղյա 11-մետրանոցներով հաղթելուց (3-3, 11մ՝ 4-2) հետո Արգենտինայի հավաքականի և անգլիական «Ասթոն Վիլայի» դարպասապահ Էմիլյանո Մարտինեսը հանդերձարանում և հետագայում Բուենոս Այրեսում չեմպիոնական տոնակատարության ժամանակ Մեսիի ներկայությամբ ծաղրել էր Մբապեին:
