«Միլանը» համաձայնության է հասել «Բայերի» կիսապաշտպան Հական Չալհանողլուի տեղափոխության առիթով: Իտալական ակումբը թուրք ֆուտբոլիստի տրանսֆերի դիմաց կվճարի 20 մլն եվրո, ևս 4 մլն եվրո «Միլանը» կարող է վճարել բոնուսների տեսքով, հաղորդում է հանրահայտ լրագրող Ջանլուկա դի Մարցիոն:
Հաղորդվում է, որ Չալհանողլուն «ռոսոներիների» հետ կստորագրի 4 տարվա պայմանագիր, իսկ նրա տարեկան աշխատավարձը կկազմի 2,5 մլն եվրո: Գործարքի մասին պաշտոնապես կհայտարարվի վաղը՝ հուլիսի 3-ին:
23-ամյա ֆուտբոլիստը Բունդեսլիգայի նախորդ առաջնությունում մասնակցել է 15 խաղի, դարձել 6 գոլի և 5 արդյունավետ փոխանցման հեղինակ: Հանդիպումների այդպիսի քիչ քանակը պայմանավորված է նրանով, որ Չալհանողլուն այս տարվա ձմռանը ստացել էր 4 ամսվա որակազրկում:
«Միլանն» ամռանն արդեն համալրվել է պաշտպաններ Ռիկարդո Ռոդրիգեսով և Մատեո Մուսակիոյով, կիսապաշտպաններ Ֆրանկ Կեսիով ու Ֆաբիո Բորինիով, ինչպես նաև հարձակվող Անդրե Սիլվայով:
