Իտալիայի գավաթի խաղարկության 1/8 եզրափակիչի «Ռոմայի» հաղթական խաղում Հենրիխ Մխիթարյանի հաշվին գրանցվել է միայն մեկ գոլային փոխանցում՝ տեղեկանում ենք Ա Սերիայի պաշտոնական կայքից։

«Լեչեի» հետ մրցավեճում հայ կիսապաշտպանը նպաստել է 81-րդ րոպեին Էլդոր Շոմուրոդովի խփած գոլին։ Իսկ 54-րդ րոպեի գոլային դրվագում նախապես Մխիթարյանին վերագրված արդյունավետ փոխանցման հեղինակ է նշվում Նիկոլո Ձանիոլոն, որի օգնությամբ է Թեմի Աբրահամը հաշիվը դարձրել 2։1՝ հօգուտ հռոմեացիների։

Սեփական դաշտում անցկացրած այդ խաղում հաղթելով 3։1 հաշվով՝ «Ռոման» անցել է քառորդ եզրափակիչ։ 15-րդ րոպեին հյուրերին առաջ է մղել Արտուրո Կալաբրեզին։ Առաջին խաղակեսի վերջում Մարաշ Կումբուլան վերականգնել է հաշվի հավասարությունը։ Վերջնարդյունքը, ինչպես նշեցինք, սահմանել են Աբրահամը և Շոմուրոդովը։

Հավելենք՝ այսօր մեր հավաքականի ավագը նշում է ծննդյան 33-ամյակը։