Լուվրը կարող է «Մոնա Լիզա»-ին տեղափոխել իր սեփական նկուղային սենյակ։ Ահա թե ինչո՞ւ.
Նա աշխարհի ամենահայտնի և ամենաշատ այցելություն ունեցող արվեստի գործն է՝ տարեկան մինչև տասը միլիոն: Նրա հանելուկային ժպիտը կուռք է գրեթե բոլոր արվեստասերների համար:
Լեոնարդո դա Վինչիի «Մոնա Լիզա» կտավը պատրաստվում է տեղափոխվել՝ Լա Ջոկոնդային ավելի մեծ տարածք տալու համար։ Այժմ Լուվրի այցելուները միջինը 50 վայրկյան են ունենում հիանալու «Մոնա Լիզա»-ով, որը ցուցադրվում է փամփուշտից պաշտպանվող ապակու հետևում: Պատկերասրահի հսկայական բազմությունը և սահմանափակ տարածքը դժվարություններ են ստեղծում այցելուների համար:
Այս խնդրին բախվելով՝ փարիզյան թանգարանի տնօրենն այժմ առաջարկում է դա Վինչիի ֆենոմենալ կտավին առանձին սենյակ հատկացնել:
««Մոնա Լիզա»-ին առանձին սենյակ տեղափոխելը կարող է վերջ դնել հանրության հիասթափությանը», - ասում է թանգարանի տնօրեն Լորենս դե Քարսը: «Այցելուներին պատշաճ կերպով չենք ընդունում ներկա սենյակում, ուստի մեր աշխատանքը ճիշտ չենք անում»:
16-րդ դարի իտալական գեղանկարչության գլխավոր համադրող Վինսենթ Դելիևինը ֆրանսիական Le Figaro թերթին ասել է. «Մենք երկար ժամանակ մտածում էինք այդ մասին, բայց այս անգամ բոլորը համաձայն են»։
Նախաձեռնությունը կպահանջի երկար վերանորոգում, ներառյալ Լուվրի պալատի նոր մուտքի բացումը (սյունասրահի ճակատային մասում) և Լուվրի քառակուսի բակի տակ գտնվող նկուղում երկու նոր սենյակների ստեղծումը: «Մոնա Լիզայի» համար կծառայի ստորգետնյա խցիկներից մեկը։ Այս փոփոխությունները կկազմեն մոտավորապես 500 միլիոն եվրո:
