Բասկետբոլի ազգային ասոցիացիայում (NBA) հանդես եկող «Դալաս Մավերիքսի» գլխավոր մարզիչ Ջեյսոն Քիդը նոր՝ երկարաժամկետ պայմանագիր է կնքել ամերիկյան ակումբի հետ, հաղորդում է ESPN-ը։

Վերջերս լուրեր էին շրջանառվում, որ «Լոս Անջելես Լեյքերսը» հետաքրքրված է 51-ամյա մասնագետի ծառայություններով։ Օրեր անց կողմերը երկարաձգել են պայմանագիրը։ Քիդը «Լեյքերսի» մարզչական շտաբում աշխատել է 2019-2021-ին։

«Մենք շատ ուրախ ենք, որ մարզիչ Քիդը շարունակելու է առաջիկա տարիներին գլխավորել մեր թիմը։ Նա արժանի էր նոր պայմանագրի»,- ասել է «Դալասի» համասեփականատեր Պատրիկ Դյումոնը։

Ամերիկացի լեգենդար բասկետբոլիստը երրորդ մրցաշրջանն է գլխավորում «Դալասը», որը 2022-ին հասել էր Արևմտյան կոնֆերենցիայի եզրափակիչ։ Այս մրցաշրջանում «Մավերիքսը» դուրս է եկել NBA-ի քառորդ եզրափակիչ, որտեղ մրցելու է «Օկլահոմա Սիթիի» հետ։