Մյունխենի «Բավարիայի» գերմանացի դարպասապահ Մանուել Նոյերը խոսել է վնասվածքից վերականգնվելու գործընթացի մասին:
«Ինձ հետ ամեն ինչ կարգին է: Նախկինում արդեն եղել է, որ վնասվածքների պատճառով երկար ժամանակ բացակայել եմ, սակայն հիմա այլ կերպ կլինի, քանի որ հստակ գիտեմ՝ երբ կվերականգնվեմ:
Այս վնասվածքը երկարաժամկետ հետևանքներ չի ունենա: Սկզբում ես շոկի էի ենթարկվել, սակայն լուրջ վնասվածքների փորձ ունեմ և արագ կարողացա ուշքի գալ:
2018 թվականին, երբ ծանր վնասվածք ստացա, բոլորն ասում էին, որ կարիերաս ավարտված է: 2022 թվականը նույնպես հեշտ չէր: Ամեն դեպքում յուրաքանչյուր վնասվածքի մեջ կա նաև հոգեբանական գործոն»,- Նոյերի խոսքը մեջբերում է The Athletic-ը:
Հիշեցնենք, որ Նոյերը դահուկով սահելիս ոտքի կոտրվածք էր ստացել հանգստի ժամանակ և այլևս խաղադաշտ դուրս չի գա այս մրցաշրջանում:
Ընթացիկ մրցաշրջանում դարպասապահը «Բավարիայի» կազմում մասնակցել է 16 խաղի, բաց թողել 14 գնդակ:
