Իտալիայի չեմպիոն «Միլանի» հարձակվող Օլիվյե Ժիրուն դարձավ Ֆրանսիայի ազգային հավաքականի պատմության լավագույն ռմբարկու։
Կատարում շարունակվող ֆուտբոլի աշխարհի առաջնության 1/8 եզրափակիչի խաղում 36-ամյա գոլահարը 44-րդ րոպեին գրավեց Լեհաստանի հավաքականի դարպասը՝ խփելով 52-րդ գոլն ազգային թիմում։
Ժիրուն գերազանցեց Լոնդոնի «Արսենալի» և կատալոնական «Բարսելոնայի» նախկին հարձակվող Թիերի Անրիի ռեկորդը։ Կարիերան ավարտած լեգենդար Անրին 1997-2010-ին Ֆրանսիայի հավաքականում անցկացրել է 123 հանդիպում ու խփել 51 գոլ։
Օլիվյե Ժիրուն 2011-ին է նորամուտը նշել Ֆրանսիայի հավաքականում, որի կազմում անցկացնում է 117-րդ հանդիպումը։ Ֆրանսիայի հավաքականի պատմության երրորդ լավագույն ռմբարկուն Մադրիդի «Աթլետիկոյի» հարձակվող Անտուան Գրիզմանն է՝ 42 գոլ։
Ֆրանսիա - Լեհաստան խաղում ընդմիջում է: Առաջին խաղակեսից հետո աշխարհի գործող չեմպիոն ֆրանսիացիները հաղթում են նվազագույն հաշվով:
