Փարիզում մեկնարկած 33-րդ Օլիմպիական խաղերի հուլիսի 27-ի մրցումային օրը պայքարի մեջ կմտնեն Հայաստանը ներկայայցող չորս մարզիկներ։

Երևանի ժամանակով 13:00-ին որակավորման փուլը կփորձի հաղթահարել Հայաստանի օլիմպիական հավաքականի ամենաերիտասարդ անդամը` 21-ամյա լողորդ Վարսենիկ Մանուչարյանը։ Նա հանդնես է գալու բաթերֆլայ ոճի 100 մետր մրցատարածությունում, որի եզրափակիչը ևս նախատեսված է այսօր։

14:30-ից մեկնարկելու է հրաձգության 10 մ օդամղիչ ատրճանակի որակավորման փուլը։ Այդ մրցաձևում Հայաստանը ներկայացնելու է Էլմիրա Կարապետյանը։

Տոկիոյի Օլիմպիական խաղերի բրոնզե մեդալակիր, աշխարհի չեմպիոն, Եվրոպայի առաջնությունների կրկնակի ոսկե մեդալակիր, Եվրոպական խաղերի հաղթող, մարմնամարզիկ Արթուր Դավթյանը մասնակցելու է հենացատկ վարժության որակավորման փուլին։

Պայքարի մեջ է մտնելու նաև Հայաստանի թիմի ամենատարեց անդամը` Եվրոպայի կրկանկի փոխչեմպիոն, Եվրոպական խաղերի արծաթե մեդալակիր, մարմնամարզիկ Վահագն Դավթյանը։ 35-ամյա մարզիկը մասնակցելու է օղակներ վարժության որակավորման փուլին։

Մարմնամարզության գործիքների որակավորման փուլը Երևանի ժամանակով մեկնարկելու է 17:30-ից։

Եզրափակիչ դուրս գալու դեպքում Էլմիրա Կարապետյանը վճռորոշ մրցումը կանցկացնի հուլիսի 28-ին։ Իսկ Արթուր Դավթյանը և Վահագն Դավթյանը որակավորման փուլի արգելքը հաղթահարելու դեպքում մեդալային պայքար կմղեն օգոստոսի 4-ին։

Հայաստանի հավաքականն Օլիմպիական խաղերում ունի 15 մասնակից՝ 7 մարզաձևում (երեքը՝ սպիտակ քարտով):

Փարիզ-2024․ Հայաստանի մարզիկների մրցելույթների ժամանակացույցը