Եվրոգավաթների ընթացիկ խաղարկությունը ՀՀ բազմակի չեմպիոն «Փյունիկի» պատմության մեջ ամենաանհաջողներից մեկն էր: Բրատիսլավայի «Սլովանի» հետ Եվրոպա լիգայի որակավորման առաջին փուլի հանդիպումներում փյունիկցիները խայտառակ պարտություններ կրեցին` մեծ հարված հասցնելով ոչ միայն իրենց, այլև հայկական ֆուտբոլի հեղինակությանը:
«Սլովանի» հետ արտագնա խաղում «Փյունիկը» մրցակցին զիջելով 0-5 հաշվով` կրկնեց եվրոգավաթներում իր ամենախոշոր հաշվով պարտության տխուր հակառեկորդը, որը գրանցվել էր 2015/16թթ. Չեմպիոնների լիգայի խաղարկության որակավորման 2-րդ փուլում նորվեգական «Մոլդեի» հետ հյուրընկալվելիս կայացած խաղում:
Հիշեցնենք, որ սեփական հարկի տակ էլ «Փյունիկը» «Սլովանին» պարտվել էր խոշոր՝ 1-4 հաշվով: Փաստորեն, երկու խաղերի ընդհանուր արդյունքով «Փյունիկը» մրցակցին զիջեց 1-9 հաշվով: Դա ևս թիմի մեկ այլ հակառեկորդի կրկնությունն է: 2011/12թթ. Չեմպիոնների լիգայի խաղարկությունում «Փյունիկը» նույնպիսի ընդհանուր արդյունքով պարտվել էր չեխական «Վիկտորիային»՝ 0-4, 1-5:
«Փյունիկն» իր պատմության մեջ 2-րդ անգամ եվրոգավաթներում մրցակցին երկու հանդիպումներում էլ զիջեց խոշոր հաշվով:
Եվրոգավաթների մասնակից հայաստանյան թիմերից մինչ այդ միայն «Կիլիկիան» ու «Բանանցն» էին երկու հանդիպումներում էլ խոշոր հաշվով պարտվել մրցակիցներին: «Կիլիկիան» 2006/07թթ. Ինտերտոտոյի գավաթի խաղարկությունում առաջին խաղում սեփական հարկի տակ Թբիլիսիի «Դինամոյին» պարտվել էր 1:5 հաշվով, իսկ հյուրընկալվելիս 3 անպատասխան գնդակ էր բաց թողել:
2008/09թթ. ՈւԵՖԱ-ի գավաթի մրցաշարում «Բանանցը» տխուր ռեկորդի հեղինակ էր դարձել` Զալցբուրգում տեղի համանուն թիմին պարտվելով անսովոր` 0:7 հաշվով: Երևանում էլ «Բանանցը» չխուսափեց խոշոր հաշվով պարտությունից: Ճիշտ է, այս անգամ ավստրիացիները բավարարվեցին խփած 3 անպատասխան գնդակով: Երկու հանդիպումներում բաց թողած գոլերի ընդհանուր քանակով էլ (10) «Բանանցի» ցուցանիշը հակառեկորդ է հայկական ֆուտբոլում:
«Փյունիկը» եվրոգավաթներում խոշոր հաշվով 10-րդ պարտությունը կրեց: Այդ ցուցանիշով փյունիկցիները յուրօրինակ ռեկորդակիրներ են: Հետաքրքիր է, որ եվրոգավաթների մասնակից հայկական 16 ակումբներից և ոչ մեկին չի հաջողվել խուսափել խոշոր հաշվով պարտությունից՝ ընդհանուր առմամբ կրելով այդ կարգի 42 պարտություն:
VivaroNews.am-ը ներկայացնում է եվրոգավաթներում «Փյունիկի» կրած խոշոր հաշվով պարտությունների տխուր ցանկը:
| Մրցաշրջան | Մրցաշար | Մրցավայր | Մրցակից | Հաշիվ |
| 1996/97 | ՈւԳ | մրց. | ՀԻԿ Ֆինլանդիա | 2-5 |
| 2002/03 | ՉԼ | մրց. | «Դինամո» Կիև, Ուկրաինա | 0-4 |
| 2009/10 | ՉԼ | մրց. | «Դինամո» Զագրեբ, Խորվաթիա | 0-3 |
| 2011/12 | ՉԼ | սեփ. | «Վիկտորիա» Չեխիա | 0-4 |
| 2011/12 | ՉԼ | մրց. | «Վիկտորիա» Չեխիա | 1-5 |
| 2012/13 | ԵԼ | սեփ. | «Զետա» Չեռնոգորիա | 0-3 |
| 2014/15 | ԵԼ | սեփ. | «Աստանա» Ղազախստան | 1-4 |
| 2015/16 | ՉԼ | մրց. | «Մոլդե» Նորվեգիա | 0-5 |
| 2017/18 | ԵԼ | սեփ. | «Սլովան» Սլովակիա | 1-4 |
| 2017/18 | ԵԼ | մրց. | «Սլովան» Սլովակիա | 0-5 |
Եվրոգավաթներում «Փյունիկը» 9-րդ անգամ 2 խաղերում էլ զիջեց մրցակցին: Վերջին անգամ այդպիսի բան տեղի էր ունեցել 2014/15թթ. Եվրոպա լիգայի խաղարկության որակավորման առաջին փուլում, որում փյունիկցիները պարտվել էին ղազախական «Աստանային»՝ 1-4, 0-2:
Եվրոգավաթների խաղարկություններում 45 անգամ մեր ակումբներն առաջին հանդիպումը տանուլ տալուց հետո անհաջողության են մատնվել նաև պատասխան խաղում: Ընդ որում 21 անգամ մրցակցի դարպասը 2 հանդիպումներում էլ անառիկ է մնացել:
Աշոտ Հայրապետյան
