Ֆրանսիայի գործող չեմպիոն Փարիզի ՊՍԺ-ն նոր գլխավոր մարզչի փնտրտուքների մեջ է, հայտնում է RMC Sport-ը:

Փարիզյան ակումբը չի ցանկանում շարունակել համագործակցությունը Քրիստոֆ Գալտյեի հետ: Մադրիդի «Ռեալի» նախկին գլխավոր մարզիչ Զինեդին Զիդանը ֆրանսիացի մասնագետին փոխարինելու գլխավոր թեկնածուն է, սակայն նրա հետ պայմանավորվելը դժվար կլինի:

Դիտարկվում է նաև Մյունխենի «Բավարիայից» հեռացված Յուլիան Նագելսմանի տարբերակը, սակայն ՊՍԺ-ում մտավախություն ունեն, որ գերմանացի մասնագետը չի կարողանա հանդերձարանը վերահսկողության տակ պահել:

Ավելի փորձառու մարզիչներից դիտարկվում են Անտոնիո Կոնտեի, Լուիս Էնրիկեի ու իտալական «Ռոման» գլխավորող Ժոզե Մոուրինյոյի թեկնածությունները։

Ֆրանսիայի առաջնության 29-րդ տուրից հետո ՊՍԺ-ն 66 միավորով առաջատար է: Չեմպիոնների լիգայում փարիզյան թիմը 1/8 եզրափակիչում պարտվել էր Մյունխենի «Բավարիային» (0-1, 0-2) և դուրս մնացել պայքարից։