«Ֆինիքս Սանզի» աստղային հարձակվող Քևին Դյուրանտը, ամենայն հավանականությամբ, խաղահրապարակ կվերադառնա «Մինեսոտա Թիմբերվուլվզի» դեմ մարտի 30-ին նշանակված խաղին, հաղորդում է The Athletic-ի ինսայդեր Շեմս Չարանիան:
Հիշեցնենք, որ Դյուրանտը վնասվածք էր ստացել «Օքլահոմա Սիթի Թանդերի» դեմ մարտի 9-ին կայացած հանդիպմանը՝ նախավարժանքի ժամանակ: Քևինն անհաջող ընկել էր, ինչի պատճառով վնասել էր ձախ կոճը:
Արիզոնայի թիմ տեղափոխվելուց հետո հարձակվողը մասնակցել է ընդամենը 3 խաղի: Ընթացիկ մրցաշրջանում Դյուրանտը միջինը վաստակում է 29,5 միավոր, 6,8 անգամ տիրում օղակից անդրադարձած գնդակին ու կատարում 5,2 արդյունավետ փոխանցում:
Արևմտյան կոնֆերենցիայում «Ֆինիքսը» 38 հաղթանակով և 35 պարտությամբ հինգերորդն է: Թիմը պարտվել է վերջին 6 խաղերից 5-ում:
