Հարձակվող Հրանտ-Լեոն Ռանոսը Հայաստանի հավաքականի գլխավոր մարզիչ Ջոն վան'տ Սխիպի կողմից ազգային թիմից հեռացվելուց հետո սոցցանցերում գրառում է կատարել` դիմելով հայ երկրպագուներին:
«Ինձ համար մեծագույն պատիվ է խաղալ իմ երկրի՝ Հայաստանի համար։
Երեկ ես առանձնազրույց եմ ունեցել գլխավոր մարզչի հետ՝ քննարկելու իմ իրավիճակը։ Ես ուզում էի նրան տեղեկացնել, որ լավ մարզավիճակում եմ, լիովին մոտիվացված եմ և պատրաստ եմ օգնել թիմին:
Ի զարմանս ինձ՝ մարզիչը տեղեկացրեց, որ մտադիր չէ ինձ ներգրավել առաջիկա հանդիպմանը։ Սա մեծ տխրություն էր ինձ համար։ Քանի որ հատկապես հիմա ինձ համար կարևոր է խաղային պրակտիկան, և այն ձեռք բերելու հեռանկարներ չկային: Մենք համատեղ պայմանավորվեցինք, որ ես կվերադառնամ «Կայզերսլաուտեռն»՝ պատրաստվելու հաջորդ խաղին։
Ուզում եմ ընդգծել, որ ինձ համար ավելի կարևոր բան չկա, քան իմ երկիրը՝ Հայաստանը ներկայացնելը։ Եվ միշտ այդպես է լինելու»,- գրել է 21-ամյա ֆուտբոլիստը:
Ռանոսը 2023 թվականի մարտից է հրավիրվում Հայաստանի ազգային հավաքական, մասնակցել է 17 հանդիպման, խփել չորս գոլ:
Հիշեցնենք, որ քիչ անց Հայաստանի հավաքականը Թբիլիսիի «Դինամո Արենայում» կանցկացնի Վրաստանի դեմ ՈՒԵՖԱ-ի Ազգերի լիգայի անցումային փլեյ-օֆֆի պատասխան խաղը:
Դիմակայության առաջին խաղում Հայաստանի ազգային հավաքականը պարտվել է 0-3 հաշվով: Պատասխան խաղը կմեկնարկի ժամը 18:00-ին, կհեռարձակվի «Ֆասթ Սպորտ» հեռուստաալիքի ուղիղ եթերում: Դիմակայության հաղթողը կնվաճի B դիվիզիոնի ուղեգիր:
