Ռուս թենիսիստուհի Միրա Անդրեևան դարձավ վերջին 27 տարում «Մեծ սաղավարտի» մրցաշարերի կանանց մենախաղի կիսաեզրափակիչների ամենաերիտասարդ մասնակիցը:
17-ամյա Անդրեևան «Ռոլան Գարոսի» քառորդ եզրափակիչում սենսացիոն հաղթանակի հասավ աշխարհի երկրորդ ռակետ, բելառուս Արինա Սաբալենկայի նկատմամբ: Աշխարհի 38-րդ ռակետը երեք սեթում առավելության հասավ 6-7, 6-4, 6-4 հաշվով, մրցախաղը տևեց 2 ժամ 29 րոպե:
Անդրեևան եզրափակիչի ուղեգիրը կվիճարկի իտալացի Յասմին Պաոլինիի հետ, որը քիչ առաջ հաղթել էր աշխարհի չորրորդ ռակետ, Ղազախստանը ներկայացնող ռուս թենիսիստուհի Ելենա Ռիբակինային:
«Մեծ սաղավարտի» մրցաշարերի կիսաեզրափակիչներում տարիքային նախորդ ռեկորդը պատկանում էր շվեյցարացի Մարտին Հինգիսին, որը 1997 թվականին ԱՄՆ-ի բաց առաջնության եզրափակիչի ուղեգիրը վիճարկել էր 17 տարեկան 37 օրականում:
