Ֆուտբոլի Ռուսաստանի ազգային հավաքականի խաղացողները մերձմոսկովյան «Կրոկուս Սիթի» համերգասրահում տեղի ունեցած ահաբեկչության հետևանքով վիրավորում ստացած մարդկանց օգնելու համար արյուն են հանձնել Կրասնոգորսկի բժշկական կենտրոնում, հայտնում է Ռուսաստանի ֆուտբոլային միության մամուլի ծառայությունը:
Ահաբեկչությունը տեղի էր ունեցել «Պիկնիկ» խմբի համերգի մեկնարկից րոպեներ առաջ, զինված տղամարդիկ կրակ էին բացել «Կրոկուս Սիթի» համերգասրահում հավաքված մարդկանց ուղղությամբ, այնուհետև պայթյուն էր եղել և խոշոր հրդեհ բռնկվել:
Այս պահի դրությամբ զոհերի թիվը գերազանցում է 100-ը, նաև կան հարյուրավոր վիրավորներ: Մոսկվայում մարտի 23-ին և 24-ին չեղյալ են համարվել զանգվածային բոլոր միջոցառումները: Ռուսաստանում մարտի 24-ը կլինի համազգային սգո օր:
Հիշեցնենք, որ այս դեպքով պայմանավորված չեղարկվել է մարտի 25-ին նախատեսված Ռուսաստան - Պարագվայ ընկերական հանդիպումը:
