«Նոան» հաղթանակով մեկնարկեց Չեմպիոնների լիգայի 2025/26 մրցաշրջանի որակավորման փուլը՝ տնային խաղում նվազագույն հաշվով պարտության մատնելով Չեռնոգորիայի «Բուդուչնոստին»:
FastNews-ը հանդիպման ամենաուշագրավ իրադարձությունները ներկայացնում է 10 փաստով.
1. 4-րդ անգամ մեկնարկի դուրս գալով եվրագավաթներում՝ «Նոան» 3-րդ անգամ հաղթանակով սկսեց իր ելույթները: Նախկինում «Նոան» հաղթանակով էր մեկնարկել Կոնֆերենցիաների լիգայի 2021/22 (ԿուՊՍ, Ֆինլանդիա, 1-0) և 2024/25 («Շկենդիա», Հս. Մակեդոնիա, 2-0) մրցաշրջաններում:
2. «Նոան» դարձավ Չեմպիոնների լիգայի մրցաշարում Հայաստանը ներկայացրած 10-րդ ակումբը: Գործող չեմպիոնը հայկական 2-րդ ակումբն է, որ հաղթանակով նշեց նորամուտը Չեմպիոնների լիգայի որակավորման մրցաշարում: Նախկինում դա հաջողվել էր միայն «Արարատ-Արմենիային», որը 2019/20 մրցաշրջանում 2-1 հաշվով հաղթել էր շվեդական ԱԻԿ-ին: Սակայն պատասխան խաղում «Արարատ-Արմենիան» պարտվել էր 1-3 հաշվով ու դուրս էր մնացել հետագա պայքարից:
3. «Բուդուչնոստի» հետ հանդիպումը հայկական ակումբների հոբելյանական՝ 350-րդ խաղն էր եվրագավաթներում: Հայաստանի ներկայացուցիչները 84-րդ հաղթանակը տարան: 63 խաղում գրանցվել է ոչ-ոքի, 203-ում հաջողությունն ուղեկցել է մրցակիցներին: Հայկական թիմերը 313 գոլ են խփել, սեփական դարպասը 627 գնդակ են ընդունել:
4. Չեմպիոնների լիգայի մրցաշարում հայկական ակումբներն անցկացրած 78 հանդիպումներում 17-րդ հաղթանակը տարան: 18 խաղում գրանցվել է ոչ-ոքի, 43-ում հայկական ակումբները պարտվել են, խփել են 64 գոլ, բաց են թողել 120 գնդակ:
5. «Նոան» դարձավ Չեմպիոնների լիգայի մրցաշարում իր օգտին հաղթանակ գրանցած հայկական 6-րդ ակումբը «Փյունիկից», «Շիրակից», «Ալաշկերտից», «Ուրարտուից» և «Արարատ-Արմենիայից» հետո: Եվրագավաթներում անցկացրած 18 հանդիպումներում «Նոան» 8-րդ հաղթանակը տարավ: Հայաստանի չեմպիոնը նույնքան անգամ էլ պարտվել է, 2 խաղ ավարտել է ոչ-ոքի, խփել է 27 գոլ, բաց է թողել 31 գնդակ:
6. Եվրագավաթների մրցաշարերում «Նոան» առաջին անգամ մրցեց Չեռնոգորիայի ներկայացուցչի հետ: «Բուդուչնոստը» Չեռնոգորիայի 6-րդ ակումբն էր, որ Եվրագավաթներում մրցավեճի բռնվեց հայկական թիմի հետ: «Նոայի» հաղթանակի շնորհիվ Եվրագավաթներում հայ-չեռնոգորական ֆուտբոլային դիմակայությունում հավասարակշռությունը խախտվեց հօգուտ հայկական ակումբների: Կայացած 13 հանդիպումներում հայկական թիմերը 5 հաղթանակ են տարել, 4 անգամ գրանցվել է ոչ-ոքի, նույնքան անգամ էլ հաղթել են Չեռնոգորիայի ներկայացուցիչները: Հայկական թիմերը խփել են 14 գոլ, բաց են թողել 13 գնդակ:
7. Սանդրո Պերկովիչը Եվրագավաթներում հայկական ակումբ գլխավորած 53-րդ մարզիչն էր: Նա դարձավ Եվրագավաթներում նորամուտը հաղթանակով նշած 13-րդ մարզիչը:
Նախկինում նման ցուցանիշ էին գրանցել Խորեն Հովհաննիսյանը, Սամվել Պետրոսյանը, Օսկար Լոպեսը, Միխայ Ստոյկիցան, Վարդան Մինասյանը, Նիկոլայ Կիսելյովը, Վարդան Բիչախչյանը, Աբրահամ Խաշմանյանը, Անդրեյ Տալալաևը, Գրիգորի Միխայլուկը, Կարեն Բարսեղյանը և Ռուի Մոտան: Ընդ որում, Օսկար Լոպեսը, Միխայ Ստոյկիցան և Վարդան Մինասյանը նորամուտը հաղթանակով էին նշել Չեմպիոնների լիգայի մրցաշարում:
8. Իմրան Ուլադ Օմարը բացեց գոլերի հաշիվը Եվրագավաթներում՝ դառնալով Չեմպիոնների լիգայի մրցաշարում «Նոայի» խփած առաջին գոլի հեղինակը: Նա ընդգրկվեց թիմի կազմում Եվրագավաթներում գոլ խփած ամենատարեց ֆուտբոլիստների տասնյակում՝ «Բուդուչնոստի» դարպասը գրավելով 27 տարեկան 209 օրականում:
9. «Բուդուչնոստի» հետ խաղին մասնակցած ֆուտբոլիստներից միայն Օգնյեն Չանչարևիչն ու Արտակ Դաշյանն են նախկինում հայկական թիմերի կազմում հանդես եկել Չեմպիոնների լիգայի մրցաշարում: Դաշյանն այդ մրցաշարում 12-րդ խաղն անցկացրեց, Չանչարևիչի համար դա 5-րդ հանդիպումն էր: Սերբ դարպասապահը Եվրագավաթներում ընդհանուր առմամբ 38 խաղի է մասնակցել, որոնցից 11-ում դարպասն անառիկ է պահել: Երկու ցուցանիշով էլ Չանչարևիչը ռեկորդակիր է դարպասապահների մեջ:
10. Դավիթ Սուալեհեն, Ալեն Գրգիչը և Մարին Յակոլիշը պաշտոնական առաջին խաղն անցկացրին «Նոայի» կազմում, իսկ Ներմին Զոլոտիչը թիմում նորամուտը նշեց Եվրագավաթներում: Զոլոտիչն ընդգրկվեց եվրագավաթներում «Նոայում» խաղացած ամենատարեց ֆուտբոլիստների տասնյակում՝ 32 տարեկան 1 օրական:
