Երգչուհի Շերը (Շերիլին Սարգսյան) MSNBC-ին տված հարցազրույցում պատմել է իր վաղեմի ընկերուհի Թինա Թըրների հետ անցկացրած օրերի և երգչուհու՝  հիվանդության դեմ պայքարի մասին:

Նրանք ընկերներ էին ավելի քան 50 տարի։ Շերը պատմել է, որ կանոնավոր կերպով այցելել է Թըրներին։ «Ես սկսեցի այցելել նրան, որովհետև մտածեցի. «Ես պետք է այս ժամանակը տրամադրեմ մեր ընկերությանը, որպեսզի նա իմանա, որ մենք չենք մոռացել իրեն», - ասել է Շերը: «Այսպիսով, մենք բոլորս հերթով այցելում էինք նրան և ժամանակ անցկացնում նրա հետ, և դա նրան ուրախացնում էր․․․»,- հավելել է նա:

Մի անգամ նույնիսկ, երբ երգչուհու առողջական վիճակը վատացել է, Թըրները Շերին խոստովանել է, որ արդեն պատրաստ է մահվան։ «Ես պարզապես չեմ ուզում այլևս համակերպվել դրա հետ», - ասել է «ռոքնռոլի թագուհին»:

Ըստ Շերի՝ երգչուհու տանը կար երիկամների դիալիզի ապարատ: «Simply The Best» հիթի կատարողը 2017 թվականին երիկամի փոխպատվաստման վիրահատության է ենթարկվել։

«Նա այնքան երկար է պայքարել այս հիվանդության դեմ և այնքան ուժեղ էր», - ասել է Շերը: 

Թինա Թըրները կյանքից հեռացել է մայիսի 24-ին՝ 83 տարեկանում, երկարատև հիվանդությունից հետո։ Վերջին տարիներին նա առողջական խնդիրներ ուներ․ տարել է գլխուղեղի կաթված, պայքարում էր քաղցկեղի և երիկամների անբավարարության դեմ:

Ընդհանուր առմամբ, իր կարիերայի ընթացքում երգչուհին ստացել է ութ «Գրեմմի» մրցանակ և երկու անգամ ընդգրկվել է «Ռոքնռոլի փառքի սրահում»։