Ռուսական «Կրասնոդարի» կիսապաշտպան Էդուարդ Սպերցյանի գործակալ Դևիդ Մանասեն մեկնաբանել է Հայաստանի հավաքականի 22-ամյա ֆուտբոլիստի ծառայություններով Մադրիդի «Ռեալի» և «ՊՍՎ Էյնդհովենի» հետաքրքրվածության մասին լուրերը:
««Ռեալի» հետաքրքրվածության մասին տեղյակ չեմ, պաշտոնական առաջարկ չի եղել: Եվրոպա տեղափոխվելու աշխատանքներ տարվում են, ամռանը պարզ կլինի»,- Դևիդ Մանասեի խոսքը մեջբերում է Metaratings-ը:
Հիշեցնենք, որ Հայաստանի 2022թ. լավագույն ֆուտբոլիստը «Կրասնոդարի» սան է, ռուսական ակումբի գլխավոր թիմում խաղում է 2021 թվականի հուլիսից: Պայմանագիրը նախատեսված է մինչև 2026 թվականի հունիսի 30-ը:
Ընթացիկ մրցաշրջանում Էդուարդ Սպերցյանը «Կրասնոդարի» կազմում մասնակցել է 21 պաշտոնական հանդիպման, դարձել 10 գոլի և 6 գոլային փոխանցման հեղինակ: Transfermarkt-ը կիսապաշտպանի տրանսֆերային արժեքը գնահատում է 9 միլիոն եվրո:
