Ռուսական «Կրասնոդարի» և Հայաստանի հավաքականի կիսապաշտպան Էդուարդ Սպերցյանը հայտնել է, որ եվրոպական ակումբների կողմից իր նկատմամբ հետաքրքրության մասին լուրերն ասեկոսեներ են:
«Ինչ վերաբերում է ապագային, ես դեռ ոչինչ չգիտեմ։ Անընդհատ շատ նորություններ են հայտնվում, ինչո՞վ են հետաքրքրված եվրոպական ակումբները։ Այո, դրանք ասեկոսեներ են: Ինձ ոչ ոք ոչինչ չի ասել։ Միգուցե ինչ-որ բան կա, և ինչ-որ մեկը դիմել է: Բայց ես դրա մասին ոչինչ չգիտեմ։
Եթե ամռանը կոնկրետ առաջարկ լինի, մենք դա կքննարկենք «Կրասնոդարի» հետ։ Նպատակներ միշտ կան։ Բայց չգիտեմ, թե ինչ կլինի»,- 22-ամյա ֆուտբոլիստի խոսքը մեջբերում է «Чемпионат»-ը:
Ավելի վաղ հաղորդվում էր, որ Հայաստանի 2022թ. լավագույն ֆուտբոլիստն ամռանը կհեռանա ռուսական ակումբից և կարիերան կշարունակի իտալական կամ գերմանական ակումբներից մեկում:
Տեղեկություններ կային նաև այն մասին, որ կիսապաշտպանի խաղին հետևում են գերմանական «Բայերի», «Ֆրայբուրգի» և Մյոնխենգլադբախի «Բորուսիայի» սկաուտները: Նշվում էր նաև, որ Սպերցյանի ծառայություններով հետաքրքրված է Միլանի «Ինտերը», որի գույները պաշտպանում է Հայաստանի հավաքականի նախկին ավագ Հենրիխ Մխիթարյանը:
Ընթացիկ մրցաշրջանում հայ ֆուտբոլիստը «Կրասնոդարի» կազմում անցկացրած 30 խաղում դարձել է 12 գոլի և 10 գոլային փոխանցման հեղինակ: Transfermarkt-ը Սպերցյանի տրանսֆերային արժեքը գնահատում է 9 միլիոն եվրո:
