Ջերմուկում ավարտին մոտեցող շախմատի Ստեփան Ավագյանի հուշամրցաշարի 7-րդ տուրում ԱՄՆ-ում բնակվող Սամուել Սևյանը սևերով 23-րդ քայլին հաշտություն կնքեց գերմանացի Ֆրեդերիկ Սվանեի հետ ու 5 միավորով շարունակում է միանձնյա գլխավորել մրցաշարային աղյուսակը:
Մրցաշարի ավարտից երկու տուր առաջ Սևյանը մեկ միավորով գերազանցում է մոտակա հետապնդողներ Հայկ Մարտիրոսյանին, Ռոբերտ Հովհաննիսյանին, իրանցի Ամին Տաբատաբաեիին և ուզբեկ Նոդիրբեկ Յակուբոևին:
Մարտիրոսյանը սպիտակներով 41-րդ քայլին պարտության մատնեց 1,5 միավորով մրցաշարային աղյուսակը եզրափակող Արթուր Դավթյանին: Հովհաննիսյանը սպիտակներով 30-րդ քայլին հաշտություն կնքեց հնդիկ Սունիլդութ Նարայանանի հետ: Տաբատաբաեին հաղթեց Յակուբոևին: Չեխիան ներկայացնող Թայ Դան Վան Նգուենի և ռուսաստանցի Անդրեյ Եսիպենկոյի պարտիան ավարտվեց ոչ-ոքի:
Մայիսի 10-ին կկայանան նախավերջին՝ 8-րդ տուրի մրցախաղերը:
