«Գանձասարի» 32-ամյա ավագ Տարոն Ոսկանյանը «Վանի» հետ 13-րդ տուրի մրցավեճում Fastex Պրեմիեր լիգայում 321-րդ խաղն անցկացրեց և գերազանցեց Արտյոմ Ադամյանի տարիքային ռեկորդը: Վերջինս այդ տարիքում Հայաստանի առաջնություններում բոլորից շատ՝ 320 խաղի էր մասնակցել:

Տարոն Ոսկանյանը տարիքային երկրորդ ռեկորդը սահմանեց: Անցյալ տարի խաղալով «Փյունիկում», նա կրկնել էր «Ուրարտուի» նախկին կիսապաշտպան Արամ Բարեղամյանի 31 տարեկանների համար սահմանած ռեկորդը՝ 300 խաղ ՀՀ առաջնություններում:

Ընթացիկ առաջնությունում Տարոն Ոսկանյանն անցկացրած խաղերի քանակով տարիքային ռեկորդ սահմանած 2-րդ ֆուտբոլիստն է: Սեպտեմբերի 29-ին «Արարատ-Արմենիայի» 33-ամյա կիսապաշտպան Կարեն Մուրադյանը ԲԿՄԱ-ի հետ մրցավեճում Fastex Պրեմիեր լիգայում 324-րդ խաղն էր անցկացրել և գերազանցել էր «Ալաշկերտի» նախկին ֆուտբոլիստ Արտակ Եդիգարյանի տարիքային ռեկորդը: Վերջինս այդ տարիքում ՀՀ առաջնություններում 323 խաղ էր անցկացրել: Ոսկանյանը հաջորդ տարի կգերազանցի նաև Մուրադյանի տարիքային ռեկորդը:

Տարոն Ոսկանյանը բավական վաղ՝ 18 տարեկանում է սկսել պրոֆեսիոնալ ֆուտբոլիստի կարիերան «Փյունիկում», որի կազմում նորամուտը նշել է 2011թ. ապրիլի 2-ին «Ուլիսի» հետ կայացած առաջնության խաղում: Այդ օրը Վարդան Մինասյանը Տարոնին ընդգրկել էր թիմի մեկնարկային կազմում: Առաջին իսկ մրցաշրջանում պատանի ֆուտբոլիստն իր հաստատուն տեղը գրավեց «Փյունիկի» կազմում՝ մասնակցելով առաջնության 28 հանդիպումներից 22-ին ու թիմակիցների հետ դարձավ արծաթե մրցանակակիր:

Fastex Պրեմիեր լիգայում անցկացրած 321 խաղերից 160-ում Տարոն Ոսկանյանը խաղադաշտ է դուրս եկել «Փյունիկի», 150-ում՝«Ալաշկերտի» խաղաշապիկով, 11 անգամ էլ մասնակցել է «Գանձասարի» հանդիպումներին:   

FastNews-ը ներկայացնում է Հայաստանի առաջնություններում անցկացրած խաղերի քանակով ֆուտբոլիստների տարիքային ռեկորդները: