«Մանչեսթեր Յունայթեդի» գլխավոր մարզիչ Էրիկ տեն Հագն Անգլիայի Պրեմիեր լիգայի 8-րդ տուրից հետաձգված խաղում «Լիդսի» հետ մարտական ոչ-ոքիից հետո կիսվել է տպավորություններով:
«Կարելի է ասել, որ մենք միավոր ենք վաստակել։ Մի կողմից լավ է, երբ թիմը վերադառնում է խաղ 0-2-ից հետո։ Բայց, մյուս կողմից, երբ խաղը սկսում ես այնպես, ինչպես մենք ենք անում, դա անընդունելի է։
Դուք պետք է պատրաստ լինեք կռվի, իսկ մենք պատրաստ չէինք դրան: Դա իմ առաջին մեկնաբանությունն էր ընդմիջմանը: Ամոթ էր, որ գոլ բաց թողեցինք ընդմիջումից անմիջապես հետո:
Իհարկե, դա մեզ կոգեշնչի։ Մի քանի օրից մենք նորից կխաղանք նրանց դեմ։ Եթե ցուցադրենք մեր ֆուտբոլը, կարող ենք հաղթել։ Մենք պետք է հաղթենք նրանց»,- հոլանդացի մասնագետի խոսքը մեջբերում է BBC Sport-ը։
Հիշեցնենք, որ մինչև 62-րդ րոպեն «Մանչեսթեր Յունայթեդը» պարտվում էր երկու գոլի տարբերությամբ, սակայն անգլիացի հարձակվող Մարկուս Ռեշֆորդի ու կիսապաշտպան Ջեյդոն Սանչոյի գոլերի շնորհիվ 8 րոպեում հավասարեցրեց հաշիվը։ Էրիկ տեն Հագի գլխավորած թիմն ուներ նաև հաղթանակ կորզելու հնարավորություններ, սակայն բավարարվեց մեկ միավորով։
Մանչեսթերյան ակումբը 22 խաղից հետո 43 միավորով երրորդն է և երկու միավոր է զիջում է երկրորդ տեղում գտնվող գործող չեմպիոն «Մանչեսթեր Սիթիին», որը մեկ հանդիպում պակաս է անցկացրել:
