Հայաստանի ազգային հավաքականի եզրային հարձակվող Տիգրան Բարսեղյանը Բրատիսլավայի «Սլովանի» կազմում չորրորդ մրցաշրջանն անընդմեջ դարձել է Սլովակիայի չեմպիոն և երկրորդ մրցաշրջանն անընդմեջ առաջնության գլխավոր ռմբարկուն է։
Բարսեղյանն այս անգամ գլխավոր ռմբարկուի կոչումը կիսել է իր թիմակցի` Դավիդ Ստրելեցի հետ: Երկուսն էլ 20-ական գոլ են խփել:
Ընդհանուր առմամբ` Բարսեղյանն այս մրցաշրջանում անցկացրել է 45 խաղ, խփել 23 գոլ և կատարել 9 գոլային փոխանցում։ Նրա գոլերից մեկը «Սլովանին» պատմության մեջ առաջին անգամ դուրս էր բերել ՈՒԵՖԱ-ի Չեմպիոնների լիգայի հիմնական փուլ: Ակումբային գլխավոր եվրագավաթի հիմնական փուլում էլ 31-ամյա ֆուտբոլիստը գրավել էր իտալական «Միլանի» դարպասը:
