Ամառային տրանսֆերային պատուհանը շուտով կփակվի, բայց ֆուտբոլային հանրությունն անհամբերությամբ սպասում է՝ տեսնելու՝ արդյոք այս ամառ կկայանա՞ երկար սպասված գործարքը՝ Մբապեի տեղափոխությունն «Արքայական ակումբ»:
Մադրիդյան կողմը երկար տարիների հետաքրքրությունից հետո միայն վերջին օրերին է պաշտոնական առաջարկով դիմել ՊՍԺ-ին: «Ռեալը» 2 առաջարկ է կատարել. նախ՝ 160 մլն եվրո, որը մերժվել է, ապա՝ 170+10 մլն եվրո, որը, ըստ մի շարք աղբյուրների, պաշտոնապես չի մերժվել:
Ինսայդեր Նիկոլո Սկիրան հաղորդում է, որ «Արքայական ակումբը» չի պատրաստվում հանձնվել ու առաջիկա ժամերին կկատարի 3-րդ՝ եզրափակիչ առաջարկը Մբապեի տրանսֆերի համար: Թե ինչ պայմաններ կառաջարկի «Ռեալը» գործարքի համար, չի նշվում, սակայն հայտնի է, որ ՊՍԺ-ն ակնկալում է 215 մլն եվրո ստանալ ֆրանսիացի գոլահարի տրանսֆերային իրավունքների վաճառքից:
Ըստ երևույթին՝ ՊՍԺ-ն կընդունի «Ռեալի» առաջարկը(180 մլն եվրո), եթե մադրիդյան կողմը գործարքում ներառի նաև իր ֆուտբոլիստներից մեկին: Այս տեղեկությունը պնդում են Կատարի էմիրի մերձավոր աղբյուրները:
Ընդգծվում է, որ «Ռեալն» ու Մբապեն արդեն համաձայնեցրել են անհատական պայմանագրի կետերը: Տրանսֆերի կայացման դեպքում ֆրանսիացին «Ռեալում» կվաստակի տարեկան 35 մլն եվրո, իսկ պայմանագրի ժամկետը կգործի մինչև 2027 թվականի ամառ:
