Հայաստանի հավաքականի գլխավոր մարզիչ Ջոն վան'տ Սխիպը «Ֆասթ Մեդիային» տված բացառիկ հարցազրույցում անդրադարձել է հարձակվող Հրանտ-Լեոն Ռանոսի՝ ազգային թիմից հեռանալու թեմային:
«21 տարեկան ֆուտբոլիստը, որը վերջին չորս ամսում 30 րոպե է անցկացրել 2-րդ Բունդեսլիգայում, մարզչին ասում է` եթե չի լինելու մեկնարկային կազմում, կհեռանա ազգային հավաքականից: Ես նման բան իմ մարզչական կարիերայի ընթացքում մինչև այս չէի տեսել:
Պետք է ուրախ լինի, որ հրավիրվել է ազգային հավաքական: Ես նրան ասել էի, որ պատասխան մրցավեճում խաղալու հնարավորություն կստանա, բայց ոչ մեկնարկից:
Միջադեպից հետո Ռանոսի գրառումն ու ինձ նրա ասածը տարբերվում են: Եվս մեկ անգամ կրկնում եմ` ինձ ասել է. «Եթե չեմ խաղալու մեկնարկից, հեռանում եմ»:
Չունեմ տեղեկություն, թե արդյոք մինչև ինձ մոտ գալը խոսե՞լ է հավաքականի ավագի կամ այլ ֆուտբոլիստի հետ: Ազգային հավաքականի ավագն ինձ չի դիմել նման հարցով: Այդպիսի բան չի եղել:
Նա 21 տարեկան է, նախկինում լավ հանդիպումներ է անցկացրել ազգային հավաքականում: Անտեսելով այն փաստը, որ վերջին չորս ամսում 30 րոպե է անցկացրել խաղադաշտում՝ մենք նրան հրավիրեցինք հավաքական, բայց չգնահատեց լավ վերաբերմունքը և հեռացավ:
Դեպքից հետո հավաքել եմ ֆուտբոլիստներին և պատմել, թե ինչ է եղել: Ասել եմ տղաներին. «Ի՞նչ է նշանակում` հրաժարվում եմ ազգային հավաքականի համար խաղալուց»: Երբեմն կարող ես լինել պահեստայինների նստարանին, նույնիսկ` տրիբունայում: Դա քո աշխատանքի մի մասն է:
Երիտասարդ է, կարող է սխալ թույլ տալ: Ես բաց եմ քննարկումների համար, կարող է զանգել ինձ, և մենք կքննարկենք նրա հնարավոր վերադարձը»,- ասել է նիդերլանդցի մասնագետը:
