Վանաձորի համայնքապետարանի ֆինանսական աջակցությամբ Վանաձորի «Բոհեմ» կամերային թատրոնը մայիսի 22-ից 25-ը հյուրախաղերով Անապայում էր։ Հայ համայնքի հրավերով, գլխավորությամբ նախագահ՝ Ռուսլան Կագրամանյանի, համայնքի մշակույթի և կրթության ղեկավար, Տիգրան Ավդալյանի անվան «ՄՈՒՇ» արվեստի կենտրոնի տնօրեն՝ Կարինե Փիլոյանի, ներկայացվեց Ստեփան Զորյանի համանուն պատմվածքի հիման վրա բեմադրված «Ցանկապատ» ներկայացումը։ Բեմադրիչը Հերիքնազ Բաղդասարյանն է։
Ներկայացումից առաջ ելույթ ունեցավ «Մուշ» արվեստի կենտրոնի տնօրեն Կարինե Փիլոյանը։ Նա ներկայացրեց «Բոհեմ» թատրոնը ռուսաստանաբնակ հայ հանդիսատեսին։ Տերունական աղոթք հնչեցրեց Հայկաձորի Սուրբ Գևորգ եկեղեցու քահանա Տեր Թադևոսը։ Ներկայացումն արժանացավ բարձր ընդունելության և բուռն ծափողջույնների։ «Բոհեմ» կամերային թատրոնի տնօրեն Հերիքնազ Բաղդասարյանը Վանաձորի համայնքապետի պաշտոնակատար Արկադի Փելեշյանի և թատրոնի անունից շնորհակալագրեր փոխանցեց Անապայի հայ համայնքին։
1992 թվականին Հայաստանից Անապա են տարել առաջին խաչքարը, որից հետո Անապայում կառուցել են Սուրբ Գևորգ եկեղեցին։ Ամեն տարի մայիսին Անապայում մեծ շուքով է նշվում խաչքարի տոնը։ Այն վաղուց քաղաքային տոների շարքում է։ «Բոհեմ» կամերային թատրոնին այս տոնի շրջանակներում էին հրավիրել Անապա։
