2024թ. Փարիզի Օլիմպիական խաղերի փոխչեմպիոն, աշխարհի կրկնակի փոխչեմպիոն, բրոնզե մեդալակիր, Եվրոպայի գործող չեմպիոն, կրկնակի փոխչեմպիոն, բրոնզե մեդալակիր Վարազդատ Լալայանը (+109 կգ) առաջին անգամ դարձավ ծանրամարտի աշխարհի չեմպիոն։

25-ամյա ծանրորդը Բահրեյնի մայրաքաղաք Մանամայում ավարտված առաջնությունում ոսկե մեդալակիր դարձավ երկամարտի 467 (215+252 կգ) արդյունքով։ Հայ ծանրորդը պոկում վարժությունում երեք հաջող մոտեցում կատարեց և նվաճեց փոքր ոսկե մեդալ, իսկ հրում վարժությունում երրոդն էր` արժանանալով փոքր բրոնզե մեդալի։

Օլիմպիական խաղերի արծաթե և բրոնզե մեդալակիր, աշխարհի կրկնակի փոխչեմպիոն, բրոնզե մեդալակիր, Եվրոպայի եռակի փոխչեմպիոն, Ասիայի կրկնակի չեմպիոն, Բահրեյնը ներկայացնող Գոռ Մինասյանն էլ երկամարտի 455 կգ (210+245) արդյունքով գրավեց չորրորդ տեղ։ Նա պոկում վարժությունում փոքր արծաթե մեդալ նվաճեց։

Հայաստանն առաջին անգամ չեմպիոն ունեցավ ծանրամարտի աշխարհի առաջնության գերծանր քաշային կարգում։

Հիշեցնենք, որ Հայաստանի մյուս ներկայացուցիչներից Գառնիկ Չոլակյանը (61 կգ), հանդես գալով B խմբում, փոքր բրոնզե մեդալ էր նվաճել պոկում վարժությունում, Ալեքսանդրա Գրիգորյանը (55 կգ) երկամարտի 205 կգ (85+120) արդյունքով դարձել էր բրոնզե մեդալակիր, Գոռ Սահակյանը (73 կգ) գրավել էր 8-րդ տեղը, Անդրանիկ Կարապետյանը (89 կգ), Դավիթ Հովհաննիսյանը (96 կգ), Արա Աղանյանը (102 կգ) զրո էին ստացել ու երկամարտի արդյունք չէին գրանցել, Գարիկ Կարապետյանը (109 կգ) պոկում վարժությունում արծաթե մեդալ էր նվաճել, իսկ հրմանը չէր մասնակցել վնասվածքի պատճառով, Տաթև Հակոբյանը (87 կգ) գրավել էր 13-րդ տեղը, Հակոբ Մկրտչյանը 96 կգ քաշային կարգի մրցման պայքարի մեկնարկից անմիջապես առաջ հրաժարվել էր մրցելույթից։