«Լիվերպուլը» թարմացումների կարիք ունի բոլոր առումներով, բայց այս պահին առաջնայինը կադրային ուժեղացումների հարցն է: Դեռ բաց է մնում Ջորջինիո Վեյնալդումի տեղը, որի հեռանալուց հետո միջին գծում համալրում չեղավ:
VNews-ը շարունակում է ուսումնասիրել եվրոպական գրանդ ակումբների տրանսֆերային գործունեությունը ամառային պատուհանի ընթացքում և հասկանալ՝ ինչ կազմ է ունենալու տվյալ ակումբը հաջորդ մրցաշրջանում:
«Լիվերպուլ»
Այսօր հայացք ենք նետում «Լիվերպուլի» կողմը: Կլոպի գլխավորությամբ՝ 2015-ի հոկտեմբերից սկսած, մերսիսայդցիները աճում, զարգանում են բնականոն հունով, նույնիսկ շատ ավելի արագ, քան սպասվում էր: Կլոպը 2-3 տարիների ընթացքում գնեց այն ֆուտբոլիստներին, որոնց շնորհիվ իր գաղափարները կյանքի էր կոչելու: Արդյունքում՝ 2018-ին «Լիվերպուլը» ՉԼ եզրափակչում էր, 2019-ին հաղթեց ՉԼ-ն, իսկ 2020-ին 30 տարվա դադարից հետո դարձավ Անգլիայի չեմպիոն: Առհասարակ, «Լիվերպուլը» վերջին տարիներին աշխարհի ուժեղագույն ակումբներից մեկն է:
Բայց 2020/21-ին մենք բոլորովին այլ թիմ տեսանք: Կլոպի թիմը նման չէր իրեն՝ ո՛չ խաղով, ո՛չ արդյունքներով. թիմն իր բարձունքից գահավիժեց տարբեր պատճառներով:
- այն խաղաոճն ու ձեռագիրը, որի շնորհիվ «Լիվերպուլը» հաղթում էր բոլորին, կորցրեց իր ուժը: Եզրային անվերջ փոխանցումներն ու գրեթե բոլոր գրոհները եզրերով անցկացնելու փորձերի հակախաղը թիմերը սկսեցին գտնել:
- շատ կարևոր դեր խաղացին վնասվածքները, այն էլ՝ պաշտպանության գծում. Ջո Գոմեսը, Վիրջիլ վան Դեյկը, Ժոել Մատիպը, Հենդերսոնը, Ֆաբինյոն… բոլորը բաց թողեցին ամիսներ, ինչը կոտրեց թիմի ողնաշարը:
- «Լիվերպուլի» խաղում նկատվեց հաղթանակներից հոգեպես բավարարվածության համախտանիշը, ինչը միշտ էլ սպառնում է կարևոր տիտղոսներ նվաճած թիմերին:
Արդյունքում՝ «Լիվերպուլը» մրցաշրջանի ընթացքում ռեկորդային քանակի պարտություններ կրեց «Էնֆիլդ» մարզադաշտում, մի կերպ՝ միայն վերջին տուրերում կարողացավ մտնել Պրեմիեր լիգայի լավագույն քառյակ, իսկ Չեմպիոնների լիգայում թիմը դուրս մնաց 1/4 եզրափակչում՝ խաղով ակնհայտորեն զիջելով «Ռեալին», որն էլ, իր հերթին, չէր անցկացնում իր լավագույն մրցաշրջաններից մեկը:
Այնպես չէ, որ «Լիվերպուլը» խնդիրները լուծելու է կադրային ջարդ իրականացնելով: Ամենևին: Այս կազմի մեծ մասը դեռ շատ բան կարող է տալ ակումբին, բայց Կլոպն իր թիմի խաղը վերարտադրելու և գալիք մրցաշրջանում նորովի ներկայանալու համար որոշ փոփոխություններ (2-3 դիրքում) պետք է իրականացնի:
Մեր ընտրանին
-
This is Անկում. Կլոպի ժամանակը սպառվե՞լ է «Լիվերպուլում»
-
250 միլիոն ու 2 սուպերաստղ. Պեպը կպայթեցնի շուկան
-
ՉԼ հաղթողը՝ ավելի հզո՞ր. 3 «բոմբ» տրանսֆերներ, որ սպառնում է անել «Չելսին»
Ովքե՞ր են հեռացել
Ջորջինիո Վեյնալդում
Ջորջինիո Վեյնալդումին «Լիվերպուլը» չվաճառեց: Հոլանդացի ֆուտբոլիստը լավ ֆուտբոլ էր խաղում, նա այն խաղացողներից էր, որին ընտրել էր Կլոպը դեռ 2016 թվականին, սակայն հոլանդացին անձամբ ցանկացավ փոխել ակումբը, միջավայրը, առաջնությունն ու երկիրը: Վեյնալդումը չերկարաձգեց գործող պայմանագիրը և գնաց ՊՍԺ՝ նոր արկածների հետևից: Բայց նա այն ֆուտբոլիստն է, ում տեղն ակումբը պետք է ինչ-որ կերպ լրացնի:
Ովքե՞ր կարող են հեռանալ
Շերդան Շաքիրի
Շերդան Շաքիրիի ժամանակը «Լիվերպուլում» կարծես ավարտվել է: Շվեյցարացի եզրային հարձակվողը «Լիվերպուլ» տեղափոխվեց 2018-ի ամռանը, հաղթեց ՉԼ-ն, Պրեմիեր լիգան, կարևոր դեր խաղաց թիմում՝ լինելով որակյալ պահեստային ֆուտբոլիստ, խփեց հիշարժան գոլեր, սակայն նա այլևս Կլոպի թիմին ոչինչ չունի տալու, փոխարենը կարող է 15-20 մլն եվրոյով լցնել ակումբի բյուջեն: Շաքիրին եվրոպական թիմերի շարքերում պահանջարկի պակաս չունի: «Սևիլիան», «Վիլյառեալը», «Նապոլին» ու «Լացիոն» հետաքրքրված են նրա ծառայություններով: Շաքիրիի նախընտրած տարբերակը «Լացիոն» է, ինչպես հայտարարել է հենց ինքը:
Նաթանիել Ֆիլիպս
Նախորդ մրցաշրջանում, կենտրոնական բոլոր պաշտպանների վնասվածքների ֆոնին, «Լիվերպուլը» Նաթանիել Ֆիլիպսի ծառայությունների կարիքն ունեցավ: Մրցաշրջանի գրեթե ամբողջ երկրորդ հատվածում Կլոպի թիմում պաշտպանության կենտրոնում Ֆիլիպսը զույգ կազմեց «Շալկեից» վարձավճարով եկած Օզան Կաբակի հետ: Բայց այս զույգը ձախողեց, Կլոպն էլ հասկացավ, որ չի կարող մեծ հույսեր կապել այս ֆուտբոլիստի հետ: 24-ամյա ֆուտբոլիստը, ամենայն հավանականությամբ, ամռանը կհեռանա թիմից: Նրան ցանկանում են գնել «Բայերը», «Նյուքասլը», «Վեսթ Հեմն» ու «Բարնլին»:
Դիվոկ Օրիգի
Դիվոկ Օրիգին էլ ժամանակի հետ «Լիվերպուլի» համար ավելի ու ավելի չօգտագործվող ֆուտբոլիստ է դառնում: Կլոպը չի խաղում վառ ընդգծված կենտրոնական հարձակվողով, Դիեգո Ժոտայի գալուց հետո էլ Օրիգին գրեթե ընդհանրապես խաղաժամանակ չի ստանում: Բելգիացի հարձակվողը, լինելով Ֆիրմինոյի պահեստայինը, քիչ, բայց անմոռանալի գոլեր է խփել «կարմիրների» համար: Նա միշտ կմնա ակումբի պատմության մեջ՝ ՉԼ կիսաեզրափակչում «Բարսելոնայի» դեմ դուբլի և եզրափակչում «Տոտենհեմի» դարպասը խփած գոլով, բայց հիմա հեռանալու ժամանակն է:
«Լիվերպուլում» որոշեցին, որ այդ ֆուտբոլիստը պետք է Իբրահիմա Կոնատեն լինի՝ «Լայպցիգի» հեռանկարային, տաղանդավոր ու երիտասարդ կենտրոնական պաշտպանը: 22-ամյա ֆրանսիացին բոլոր տվյալներն ունի մեկնարկային կազմում հաստատվելու և խաղը բարելավելու հարցում: «Կարմիրները» հենց այնպես նրա համար 40 մլն եվրո չէին վճարի:
Սաուլ Նիգես
Վեյնալդումի հեռանալուց հետո նույնքան խոցելի է դարձել «Լիվերպուլի» համար կիսապաշտպանության կենտրոնը: Մերսիսայդցիների տրանսֆերային գլխավոր նպատակն այս դիրքն ամրապնդելն է, որի համար էլ կան մի շարք թեկնածուներ:
Համար մեկ թեկնածուն «Ատլետիկոյի» կիսապաշտպան Սաուլ Նիգեսն է: Իսպանացին մրցաշրջանի ավարտից հետո հայտարարեց, որ մտադիր է հեռանալ մադրիդյան ակումբից, և նա իսկական նվեր կարող է լինել ինչպես «Լիվերպուլի», այնպես էլ՝ եվրոպական յուրաքանչյուր գրանդի համար, որն ունի համալրման կարիք այդ դիրքում: Նույնիսկ զարմանալի է, որ Սաուլին դեռ ոչ ոք չի գնել: Այս ֆուտբոլիստը տարեց չէ, բայց շատ փորձառու է, բազմակողմանի զարգացած կիսապաշտպան է, կարող է խաղալ տարբեր դիրքերում, փակել հենակետայինի գոտին կամ գործել որպես box to box կիսապաշտպան:
Ըստ վերջին լուրերի՝ Սաուլի գործակալը Անգլիայում է, բայց «Լիվերպուլը» միայնակ չէ նրա համար մրցակցությունում: «Մանչեսթեր Յունայթեդը» նույնպես մեծ շանսեր ունի Սաուլին գնելու համար:
Պլան բ. Յուրի Տիլեմանս
Մոտավորապես նույն տրանսֆերային արժեքն ունի նաև «Լեսթերի» կիսապաշտպան Յուրի Տիլեմանսը: Բելգիացին վերջապես ցույց է տալիս այն հասուն խաղը, որ տարիներ առաջ կանխատեսում էին մասնագետները, և կա տպավորություն, որ «Լեսթերն» այլևս այն հարթակը չէ, որտեղ նա կարող է ցույց տալ իր ամբողջ ներուժը: «Լիվերպուլի» ղեկավարները բարձր են գնահատում Տիլեմանսի խաղը:
Տիլեմանսի հետ փորձում է նոր պայմանագիր կնքել նաև «Լեսթերը»: Առաջիկա օրերին բելգիացի ֆուտբոլիստը պետք է պատասխանատու որոշում կայացնի և ընտրություն կատարի «Լեսթերի» ու «Լիվերպուլի» միջև:
Կենտրոնական կիսապաշտպանի հարցում, առհասարակ, «Լիվերպուլի» թիրախների ցանկը մեծ է. Նիկոլո Բարելա, որին շատերը «նոր Ջերարդ» են համարում, Միկել Դամսգոր՝ ԵՎՐՈ 2020-ի բացահայտումներից մեկը, Ռենատու Սանշեշ…
Ադամա Տրաորե
Կլոպը «ձեռքի հետ» էլ փորձում է հարձակումն ուժեղացնելու տարբերակներ որոնել: Շաքիրիի ու Օրիգիի հեռանալուց հետո հարձակման գծում իսկապես այլընտրանքային լուծումներ գտնելը հեշտ չի լինելու գերմանացի մասնագետի համար: Բացի դա՝ Մանե-Սալահ-Ֆիրմինո եռյակը որոշակի թարմացման կարիք արդեն ունի:
Կլոպի համար հարձակումը թարմացնելու գլխավոր թեկնածուն «Վուլվերհեմփթոնի» վինգեր Ադամա Տրաորեն է: Այս ֆուտբոլիստն օժտված է ֆիզիկական նախանձելի պատրաստվածությամբ, մեծ արագությամբ, տեխնիկայով ու որակյալ հարվածներով: Կարճ ասած, խաղային տվյալներով այս խաղացողը կարող է լինել լավագույններից մեկն աշխարհում, բայց «Վուլվերհեմփթոնում» նրանից առավելագույնը քաղել չի հաջողվում:
Էլ ո՞վ, եթե ոչ Կլոպը կարող է լավագույն ձևով օգտագործել Տրաորեին: Սակայն Տրաորեն նույնպես հեշտ չի տրվի «Լիվերպուլին»: Տրանսֆերային մրցավազքում է նաև «Լիդսը», որը պատրաստվում է առաջարկել 35-45 մլն եվրո:
Մեկնարկային կազմի 2 տարբերակ
Առաջիկա մրցաշրջանում Կլոպը կարող է խաղալ իր դասական սխեմայով՝ 4-3-3-ով, բայց կարող է ունենալ նաև այլընտրանք: 3 կենտրոնական պաշտպանով խաղը «Լիվերպուլի» համար նորարարություն է՝ հղի ռիսկերով, բայց այն կարող է թիմին ապահովել անհրաժեշտ հավասարակշռությամբ: Այդ սխեմայից ամենաշատը կշահեն Ռոբերտսոնն ու Տրենտ Ալեքսանդր-Առնոլդը, որոնք կկարողանան մեծ ազատությամբ միանալ հարձակումներին ու կատարել բազմաթիվ գոլային փոխանցումներ, իսկ Մանեն ու Սալահը (չմոռանանք նաև Ադամայի մասին, որը կարող է միանալ թիմին), իրենց արագությունները կկարողանան օգտագործել հակագրոհների ժամանակ:
View this post on Instagram
