Գերմանիայի Դյուսելդորֆ քաղաքում ընթացող շախմատի WR Chess Masters մրցաշարի մասնակիցները մեկօրյա հանգստից հետո կրկին նստեցին խաղասեղանների շուրջ՝ անցկացնելով 5-րդ տուրի մրցախաղերը:
Լևոն Արոնյանը սպիտակներով 48-րդ քայլին հաղթեց նիդերլանդցի Անիշ Գիրիին: Դա Հայաստանի հավաքականի նախկին առաջատարի 3-րդ հաղթանակն էր մրցաշարում։
Մինչև այս Արոնյանը հաղթել էր հնդիկ Ռամեշբաբու Պրագնանանդհային և ուզբեկ Նոդիրբեկ Աբդուսատորովին, ոչ-ոքի էր խաղացել գերմանացի Վինսենտ Կեյմերի և լեհ Յան-Քշիշտոֆ Դուդայի հետ:
5-րդ տուրից հետո ԱՄՆ-ը ներկայացնող հայ գրոսմայստերը 4 միավորով ամրապնդեց միանձնյա առաջատարի դիրքը: Նա մեկ միավորով գերազանցում է իրեն հետապնդող ԱՄՆ-ի ներկայացուցիչ Ուեսլի Սոյին և հնդիկ Դոմարաջու Գուկեշին:
Սոն հաշտություն կնքեց ռուսաստանցի Անդրեյ Եսիպենկոյի հետ, Գուկեշը ոչ-ոքի խաղաց ռուսաստանցի Յան Նեպոմնյաշչնու հետ: Միավորը բաժանեցին նաև Ռամեշբաբու Պրագնանանդհան և Յան-Քշիշտոֆ Դուդան: Վինսենտ Կեյմերը հաղթեց Նոդիրբեկ Աբդուսատորովին:
Փետրվարի 22-ին կայանալիք 6-րդ տուրում Լևոն Արոնյանը սևերով կմրցի Ուեսլի Սոյի հետ:
