Գերմանիայի Դյուսելդորֆ քաղաքում շարունակվող շախմատի WR Chess Masters մրցաշարի 6-րդ տուրում Լևոն Արոնյանը սև խաղաքարերով միավորը կիսեց ԱՄՆ-ի ներկայացուցիչ Ուեսլի Սոյի հետ։ Պարտիան ավարտվեց 35-րդ քայլին։
Դա Հայաստանի հավաքականի նախկին առաջատարի երրորդ ոչ-ոքին էր մրցաշարում, որտեղ նա տարել է նաև երեք հաղթանակ։
Նախորդ 5 պարտիաներում Լևոն Արոնյանը հաղթել էր հնդիկ Ռամեշբաբու Պրագնանանդհային, ուզբեկ Նոդիրբեկ Աբդուսատորովին և նիդերլանդցի Անիշ Գիրիին, ոչ-ոքի էր խաղացել գերմանացի Վինսենտ Կեյմերի և լեհ Յան-Քշիշտոֆ Դուդայի հետ:
Տուրի մյուս պարտիաներն էլ ավարտվեցին ոչ-ոքի: Հաշտություն կնքեցին նաև Անիշ Գիրին ու Ռամեշբաբու Պրագնանանդհան, ռուսաստանցիներ Յան Նեպոմնյաշչնին ու Անդրեյ Եսիպենկոն, Յան-Քշիշտոֆ Դուդան ու Վինսենտ Կեյմերը, հնդիկ Դոմարաջու Գուկեշն ու Նոդիրբեկ Աբդուսատորովը:
6-րդ տուրից հետո Արոնյանը 4,5 միավորով շարունակում է միանձնյա գլխավորել մրցաշարային աղյուսակը: Նա մեկ միավորով գերազանցում է իրեն հետապնդող Ուեսլի Սոյին և Դոմարաջու Գուկեշին:
Փետրվարի 23-ին կայանալիք 7-րդ տուրում Արոնյանը սպիտակներով կմրցի Յան Նեպոմնյաշչնու հետ: Մրցաշարի ավարտին մնացել է 3 տուր:
