Անգլիական «Լիվերպուլի» գլխավոր մարզիչ Յուրգեն Կլոպը մեկնաբանել է Լևերկուզենի «Բայերը» գլխավորող Խաբի Ալոնսոյի կայացրած որոշումը: Իսպանացի մասնագետը հայտարարել է, որ ընթացիկ մրցաշրջանի ավարտից հետո չի հեռանա գերմանական ակումբից:
«Խաբին հիանալի աշխատանք է կատարում: Ես հասկանում եմ նրան, թե ինչու է ցանկանում մնալ: Ես ամեն ինչ գիտեմ երիտասարդ մարզիչ լինելու և հաջողակ լինելու մասին: Ես գրեթե նույն բանն արեցի և երբեք չեմ զղջացել դրա համար»,- նշել է գերմանացի մասնագետը լրագրող Բեն Ջեյքոբսի հետ զրույցում:
Նախորդ ամիս տեղեկություններ կային այն մասին, որ Ալոնսոն ամռանը կարող է գլխավորել «Լիվերպուլը»՝ փոխարինելով Կլոպին, որը ընթացիկ մրցաշրջանի ավարտից հետո կհեռանա անգլիական գրանդից:
Ալոնսոն 2022 թվականից է աշխատում «Բայերում», որը Բունդեսլիգայի առաջատարն է և 10 միավորով առաջ է երկրորդ տեղում գտնվող գործող չեմպիոն Մյունխենի «Բավարիայից»: Ընթացիկ մրցաշրջանում Լևերկուզենի թիմը բոլոր մրցաշարերում անցկացրել է 38 խաղ, տարել 33 հաղթանակ և 5 հանդիպում ավարտել ոչ-ոքի:
