Ապրիլի 1-ին կկայանան Հայաստանի գավաթի քառորդ եզրափակիչի պատասխան երկու հանդիպումները:

FastNews-ը ներկայացնում է գավաթի քառորդ եզրափակիչի պատասխան հանդիպումների անոնսը։

«Լեռնային Արցախ» - «Փյունիկ»

Ապրիլի 1, ժամը՝ 16:00, Երևան, «Ջունիոր սպորտ» մարզադաշտ

4 խաղ, որոնցում հաղթել է «Փյունիկը», խփած և բաց թողած գոլերի հարաբերակցությունը՝ 3-17

1-ին խաղ  05.03.2025  «Փյունիկ» - «Լեռնային Արցախ»՝ 7-2 (2-0)

Գոլերը՝ 1-0՝ Թեմուր Ջիկիա 40՛, 2-0՝ Մատաս Վարեյկա 45՛, 3-0՝ Լևոն Պետրոսյան 59՛, 4-0՝ Թեմուր Ջիկիա 64՛, 4-1՝ Իլիա Տրնկո 70՛, 4-2՝ Միլոշ Միլովանովիչ 81՛, 5-2՝ Տիգրան Գևորգյան 84՛, 6-2՝ Լևոն Պետրոսյան 85՛, 7-2՝ Պետրոս Ալեքյան 90+5՛:

Հետաքրքիր փաստեր՝ հանդիպմանն ընդառաջ

1.Առաջին խաղում գրանցված խոշոր հաշվով պարտությունից հետո «Լեռնային Արցախը» կարող է իր ողջ ուշադրությունը բևեռել Առաջին խմբի առաջնության վրա, որտեղ 16 խաղում վաստակած 29 միավորով ընթանում է 3-րդ տեղում: Fastex Պրեմիեր լիգայի ուղեգրի համար պայքարում «Լեռնային Արցախը» 14 միավորով զիջում է «Սյունիքին»: Առաջնության վերջին խաղում արցախցիները սեփական դաշտում ոչ-ոքի են խաղացել «Արարատ-2-ի» հետ՝ 1-1:

«Լեռնային Արցախը» գավաթի ընթացիկ խաղարկությունը սկսել է նախնական փուլից, որտեղ 7 անպատասխան գնդակ է ուղարկել «Բենտոնիտի» դարպասը: Դա գավաթի մրցաշարերում թիմի տարած ամենախոշոր հաշվով հաղթանակն է: Այդ խաղում Տիգրան Հակոբյանը, Օլուեբուբե Օնուոհան և Ախմեդ Ջինդոյանը դուբլի հեղինակ էին դարձել, մեկ գոլ էլ խփել էր Արթուր Օրդինյանը:

1/8 եզրափակչում «Լեռնային Արցախը» 2-0 հաշվով պարտության է մատնել «Միկային»: Գոլերի հեղինակներ են դարձել Օլուեբուբե Օնուոհան և Ախմեդ Ջինդոյանը, որոնք 3-ական գնդակով կրկնեցին թիմի նախկին հարձակվող Արարատ Ղազարյանի 2001թ. մրցաշարում գրանցած արդյունավետության ռեկորդը: Նրանք ընդամենը մեկ գոլով են զիջում գավաթի ընթացիկ խաղարկության լավագույն ռմբարկուների ցանկը գլխավորող «Սյունիքի» հարձակվող Արտեմ Հարությունյանին:

Այդ խաղում «Միկայի» դարպասապահ Սարգիս Դերձակյանը բացառիկ ռեկորդ սահմանեց՝ հանդիպման հիմնական ժամանակում հետ մղելով 3 11մ հարված, հաղթող դուրս գալով Ախմեդ Ջինդոյանի, Արթուր Օրդինյանի և Տիգրան Հակոբյանի հետ պայքարում:

2. Հայաստանի ութակի գավաթակիր «Փյունիկը» դեռևս քառորդ եզրափակիչի առաջին խաղում էր գործնականում լուծել հաջորդ փուլ դուրս գալու խնդիրը՝ ոչ հիմնական կազմով 7-2 հաշվով ջախջախելով մրցակցին: Այնպես որ պատասխան խաղում էլ Եղիշե Մելիքյանը հնարավոր է խաղադաշտ դուրս բերի մի խումբ երիտասարդ ֆուտբոլիստների:

«Փյունիկն» անհաջող է խաղում առաջնության վերջին 4 հանդիպումներում՝ կրելով 3 պարտություն: Վերջինն «Արարատ-Արմենիայից» էր՝ 2-3: 

Գավաթի նախորդ երկու խաղարկություններում փյունիկցիները հասել էին մինչև կիսաեզրափակիչ, որտեղ զիջել էին համապատասխանաբար «Շիրակին» (1-1, 3-5` 11մ) և «Արարատ-Արմենիային» (0-1): Արդեն 10 տարի է, ինչ փյունիկցիները գավաթի նվաճման բերկրանքը չեն վայելել: «Փյունիկը» վերջին անգամ գավաթակիր է դարձել 2014/15թթ. խաղարկությունում՝ Սարգիս Հովսեփյանի գլխավորությամբ եզրափակչում 3-1 հաշվով հաղթելով «Միկային»: Իսկ գավաթի եզրափակչում վերջին անգամ փյունիկցիները խաղացել են 2017թ.՝ 0-3 հաշվով պարտվելով «Շիրակին»:

3. Գավաթի մրցաշարերում մրցակիցները 3-րդ անգամ են զույգեր կազմել: Գավաթային առաջին մրցավեճը կայացել է 30 տարի առաջ՝ 1995թ. մարտի 10-ին: «Փյունիկը», որ այն ժամանակ կրում էր ՀՄԸՄ անվանումը, գավաթի 1/8 եզրափակչում 4-0 հաշվով հաղթեց Ստեփանակերտի «Երազանքին»: Գեղամ Հովհաննիսյանը դուբլ ձևակերպեց, մեկական գոլ էլ խփեցին Արսեն և Վարազդատ Ավետիսյանները:

3 տարի անց՝ 1998թ. ապրիլին մրցակիցները հանդիպեցին գավաթի քառորդ եզրափակչում: Առաջին խաղում «Փյունիկը» հյուրընկալվելիս «Ղարաբաղին» հաղթեց Վահե Յաղմուրյանի խփած միակ գոլի շնորհիվ: Պատասխան խաղում փյունիկցիները մրցակցին պարտության մատնեցին խոշոր՝ 5-1 հաշվով: Փյունիկցիներից աչքի ընկան Սեյրան Պողոսյանը, Վարդան Մինասյանը, Նշան Էրզրումյանն ու Արսեն և Վարազդատ Ավետիսյանները: «Ղարաբաղի» միակ գոլի հեղինակը Մհեր Ավանեսյանն էր:

4. Գոլ խփելու դեպքում «Փյունիկի» հարձակվող Յուսուֆ Օտուբանջոն պատմական նվաճման կհասնի: Դա կլինի նիգերիացի ֆուտբոլիստի 87-րդ գոլն ակումբային բոլոր մրցաշարերում, որի շնորհիվ նա կգերազանցի բրազիլացի Մարկոս Պիզելիին ու կդառնա Հայաստանում հանդես եկած ամենաարդյունավետ այլազգի ֆուտբոլիստը:

Դիմակայության լավագույն ռմբարկուները

«Փյունիկ»՝ Գեղամ Հովհաննիսյան, Արսեն Ավետիսյան, Վարազդատ Ավետիսյան, Թեմուր Ջիկիա, Լևոն Պետրոսյան - 2-ական գոլ:

«Արարատ-Արմենիա» - «Ուրարտու»

Ապրիլի 1, ժամը՝ 19:00, Ֆուտբոլի ակադեմիայի մարզադաշտ

3 խաղ, «Արարատ-Արմենիան» հաղթել է 1 անգամ, «Ուրարտուն»՝ 1, գրանցվել է 1 ոչ-ոքի, խփած և բաց թողած գոլերի հարաբերակցությունը՝ 2-5

1-ին խաղ  05.03.2025  «Ուրարտու» - «Արարատ-Արմենիա»՝ 0-1 (0-0)

Գոլը՝ 0-1՝ Տենտոն Յենե 48՛, 11մ:

Հետաքրքիր փաստեր՝ հանդիպմանն ընդառաջ

1. Գործող գավաթակիր «Արարատ-Արմենիան» իր տիտղոսի պաշտպանությունը սկսել է քառորդ եզրափակչից: Թեև առաջին խաղում հյուրընկալվելիս «Արարատ-Արմենիան» նվազագույն հաշվով հաղթել է, սակայն կիսաեզրափակչի ուղեգրի հարցը կվճռվի պատասխան մրցավեճում:

«Արարատ-Արմենիան» բարձր տրամադրությամբ կներկայանա այս հանդիպմանը, քանի որ առաջնության նախորդ տուրում 3-2 հաշվով կամային հաղթանակ էր տոնել «Փյունիկի» նկատմամբ: Առաջնության վերջին 4 հանդիպումներում Վարդան Մինասյանի գլխավորած թիմն անպարտելի է՝ վաստակելով 10 միավոր:

«Արարատ-Արմենիան» 8-րդ անգամ է մասնակցում Հայաստանի գավաթի խաղարկությանը: Նախորդ մրցաշարում էլ թիմը Վարդան Մինասյանի գլխավորությամբ հասավ ամենամեծ հաջողությանը՝ առաջին անգամ նվաճելով Հայաստանի գավաթը:

2024թ. մայիսի 12-ին «Հանրապետական» մարզադաշտում կայացած վճռորոշ խաղում «Արարատ-Արմենիան» հետխաղյա 11մ հարվածաշարում 5-3 հաշվով հաղթել էր «Ուրարտուին»: 31-րդ րոպեին Միքայել Միրզոյանը հաշվի մեջ առաջ էր մղել «Ուրարտուին»: 7 րոպե անց «Արարատ-Արմենիան» Արման Ղազարյանի ինքնագոլի շնորհիվ վերականգնել էր հավասարակշռությունը:

2. Գավաթի նախորդ խաղարկության եզրափակչի մասնակից «Ուրարտուն» պատվավոր մրցանակի համար պայքարը սկսել է 1/8 եզրափակչից՝ Աբովյանում 4-0 հաշվով հաղթելով ԲԿՄԱ-ին: Այդ խաղում Էդգար Մովսեսյանը դուբլի հեղինակ էր դարձել, մեկական գոլ էլ խփել էին Անտոն Կիլինն ու Լեոն Սաբուան:

Գավաթի նախորդ 11 խաղարկություններից միայն մեկում՝ 2020/21թթ. մրցաշարում  «Ուրարտուին» չի հաջողվել կիսաեզրափակչի ուղեգիր նվաճել՝ քառորդ եզրափակչում երկու խաղերի ընդհանուր արդյունքով զիջելով  «Նոային» (0-2, 2-2): Ընդհանուր առմամբ, «Ուրարտուին» 22 անգամ է հաջողվել հաղթահարել քառորդ եզրափակիչ փուլի արգելքը:

Կասկածից վեր է, որ «Ուրարտուն» «Արարատ-Արմենիայի» հետ պատասխան խաղում էլ կներդնի իր բոլոր ուժերը շարունակելու պայքարը պատվավոր մրցանակի համար:

3. Իսկ գավաթային առաջին հանդիպումը մրցակիցների միջև կայացել է 2022թ. նոյեմբերի 26-ին: Քառորդ եզրափակիչ այդ խաղում «Ուրարտուն» հյուրընկալվելիս Մաքսիմ Մայրովիչի, Դավիթ Խուրցիձեի, Դմիտրո Խլյոբասի և Նարեկ Գրիգորյանի խփած գոլերի շնորհիվ հաղթեց 4-0 հաշվով:

4. «Ուրարտուն» Հայաստանի առաջին գավաթակիրն է: 1992թ. «Բանանցը» Վարուժան Սուքիասյանի գլխավորությամբ եզրափակչում 2-0 հաշվով հաղթեց ՀՄԸՄ-ին: Այդ հաջողությունից հետո թիմը ևս 3 անգամ նվաճել է պատվավոր մրցանակը: 2007թ. «Բանանցը» չեխ մարզիչ Յան Պոշտուլկայի գլխավորությամբ եզրափակչում  լրացուցիչ ժամանակում 3-1 հաշվով հաղթել է «Արարատին»:

2016թ. «Ուրարտուն» 3-րդ անգամ դարձավ գավաթակիր՝ Տիտո Ռամալյոյի գլխավորությամբ եզրափակչում 2-0 հաշվով պարտության մատնելով «Միկային»: Առայժմ վերջին հաջողությանը թիմը հասել է Դմիտրի Գունկոյի օրոք՝ 2023թ. եզրափակչում 2-1 հաշվով հաղթելով «Շիրակին»:

5. Առաջնությունում մրցակիցների վերջին հանդիպումը կայացել է 20-րդ տուրում: Փետրվարի 25-ին Չարենցավանում կայացած խաղում «Ուրարտուն» հաղթել էր 2-1 հաշվով: Առաջին շրջանի խաղն էլ ավարտվել էր Դմիտրի Գունկոյի գլխավորած թիմի հաղթանակով՝ 3-1: Հետաքրքիր է, որ հաջորդ տուրում մրցակիցները կրկին հանդիպելու են, այս անգամ՝ «Ուրարտուի» մարզադաշտում:

Ընդհանուր առմամբ Fastex Պրեմիեր լիգայում մրցակիցների միջև անցկացված 23 խաղերում «Արարատ-Արմենիան» և «Ուրարտուն» 8-ական հաղթանակ են տոնել, 7 անգամ էլ գրանցվել է ոչ-ոքի:

«Վեստ Արմենիա» - «Վան»

Ապրիլի 2, ժամը՝ 16:00, Երևան, «Ջունիոր սպորտ» մարզադաշտ

2 խաղ, որոնցում հաղթել է «Վանը», խփած և բաց թողած գոլերի հարաբերակցությունը՝ 1-5

1-ին խաղ  06.03.2025  «Վան» - «Վեստ Արմենիա»՝ 3-0 (1-0)

Գոլերը՝ 1-0՝ Կարեն Նալբանդյան 45+1՛, 11մ, 2-0՝ Մոմո Տուրե 58՛, 11մ, 3-0՝ Կարեն Նալբանդյան 60՛:

Հետաքրքիր փաստեր՝ հանդիպմանն ընդառաջ

1.Վերջին մեկ ամսում մրցակիցները 3-րդ անգամ են մրցավեճի բռնվելու: Գավաթի քառորդ եզրափակիչ առաջին խաղում «Վանը» սեփական դաշտում 3 անպատասխան գնդակ խփեց մրցակցի դարպասը՝ զգալիորեն մեծացնելով հաջորդ փուլի ուղեգիր նվաճելու իր հնարավորությունները: Մարտի 16-ին կայացած առաջնության խաղում էլ «Վանը» հաղթեց 2-0 հաշվով:

«Վանը» գավաթի ընթացիկ խաղարկությունը սկսել է նախնական փուլից՝ 3 անպատասխան գնդակ խփելով «Անդրանիկի» դարպասը: Գոլերի հեղինակներ են դարձել Էմանուել Ջոնը, Օլավալե Ֆառայոլան և Մամադու Դիալոն:

1/8 եզրափակչում էլ Վահե Գևորգյանի գլխավորած թիմը նույնպիսի հաշվով պարտության է մատնել «Շիրակին»: Մոմո Տուրեն դարձել է դուբլի հեղինակ, մեկ գոլ էլ խփել է Իզուչուկվու Օկոնկվոն:

Մոմո Տուրեն 3 գնդակով Հայաստանի գավաթի մրցաշարերում «Վանի» պատմության լավագույն ռմբարկուն է: Նա իր գոլերի հաշիվը բացել էր գավաթի նախորդ խաղարկությունում՝ անցյալ տարվա մարտի 12-ին Երևանում «Փյունիկի» հետ կայացած քառորդ եզրափակիչ խաղում:

2. «Վեստ Արմենիան» պատվավոր մրցանակի համար պայքարը սկսել է 1/8 եզրափակչից՝ սեփական դաշտում 2-1 հաշվով հաղթելով «Սյունիքին»: Թիմի հաղթանակն ապահովել էին Տիմուր Ռուդոսելսկու և Արթուր Դանիելյանի խփած գոլերը:

3. Մրցակիցների միջև գավաթային նախորդ հանդիպումը կայացել է 2023թ. նոյեմբերի 23-ին Չարենցավանում, որտեղ «Վանը» հաղթել է 2-1 հաշվով: Հաշիվն առաջին խաղակեսի ավելացված ժամանակում 11մ հարվածով բացել էր Քրիստոֆեր Բոնիֆեյսը: 2-րդ խաղակեսի սկզբում Վրեժ Չիլոյանը կրկնապատկել էր հաշիվը, որին «Վեստ Արմենիան» պատասխանել էր Արման Խաչատրյանի գոլով:

4. Գավաթի մրցաշարերում «Վանն» ամենամեծ հաջողությանը հասել է 2021/22թթ. խաղարկությունում՝ հասնելով մինչև կիսաեզրափակիչ, որտեղ 0-3 հաշվով պարտվել է «Ուրարտուին»:

«Վեստ Արմենիայի» համար առայժմ ամենամեծ հաջողությունը քառորդ եզրափակչում հանդես գալն է: Թիմը 2-րդ անգամ է այդ փուլի ուղեգիր նվաճել: Գավաթի 2020/21թթ. մրցաշարում է առաջին անգամ «Վեստ Արմենիան» խաղացել քառորդ եզրափակչում, որտեղ երկու հանդիպումների ընդհանուր արդյունքով զիջել է «Արարատին»՝ 2-0, 1-5: Այդ ժամանակ «Վեստ Արմենիան» հանդես էր գալիս Առաջին խմբում:

5. Առաջնության նախորդ տուրն անհաջող էր «Վեստ Արմենիայի» համար, որը հյուրընկալվելիս 0-3 հաշվով պարտվեց ԲԿՄԱ-ին: «Վանն» էլ «Ալաշկերտի» հետ խաղում բավարարվեց ոչ-ոքիով, թեև հաղթում էր 2-0 հաշվով:

Դիմակայության լավագույն ռմբարկուն

«Վան»՝ Կարեն Նալբանդյան - 2 գոլ:

«Նոա» - «Գանձասար»  

Ապրիլի 2, ժամը՝ 18:00, Աբովյան, Վահագն Թումասյանի անվան մարզահամալիր

1 խաղ, որում հաղթել է «Նոան», խփած և բաց թողած գոլերի հարաբերակցությունը՝ 3-0

1-ին խաղ  06.03.2025  «Գանձասար» - «Նոա»՝ 0-3 (0-1)

Գոլերը՝ 0-1՝ Մաթեուս Այաս 45+3՛, 11մ, 0-2՝ Հովհաննես Համբարձումյան 51՛, 0-3՝ Բրունո Ալմեյդա 87՛: 

Հետաքրքիր փաստեր՝ հանդիպմանն ընդառաջ

1. «Նոան» գավաթի առաջին խաղում 3-0 հաշվով վստահ հաղթանակ տարավ «Գանձասարի» նկատմամբ, նույնպիսի արդյունք գրանցեց նաև մարտի 10-ին կապանցիների հետ կայացած առաջնության խաղում: Այնպես որ հաջորդ փուլի ուղեգրի նվաճման հարցում «Նոան» չպետք է խնդիրներ ունենա:

«Նոան»  փետրվարի 19-ին «Ալաշկերտի» հետ մրցավեճով մեկնարկեց գավաթի ընթացիկ խաղարկությունում: Գոնսալո Գրեգորիոյի և Գոռ Մանվելյանի խփած գոլերի շնորհիվ Ռուի Մոտայի գլխավորած թիմը քառորդ եզրափակչի ուղեգիր նվաճեց:

Գավաթի ընթացիկ խաղարկությունը 8-րդն է «Նոայի» համար: Ամենամեծ հաջողությանը թիմը հասել է 2020թ.՝ նվաճելով պատվավոր մրցանակը: Գերարդյունավետ եզրափակչում (5-5) «Նոան» Իգոր Պիկուշչակի գլխավորությամբ հետխաղյա 11մ հարվածաշարում 7-6 հաշվով հաղթել էր «Արարատ-Արմենիային»:

2. Հայաստանի գավաթի մրցաշարերին «Գանձասարը» 3-րդ անգամ է մասնակցում: Ընթացիկ խաղարկությունը գանձասարցիները սկսել են նախնական փուլից՝ Արմավիրում 2 անպատասխան գնդակ խփելով Արարատի «Արաքսի» դարպասը: Հաշիվը բացել էր մրցակցի ֆուտբոլիստ Պաուլո Ռուիսը՝ գնդակն ուղարկելով սեփական դարպասը, այնուհետև Աշոտ Քոչարյանը 2-րդ գոլն էր խփել:

1/8 եզրափակչում «Գանձասարը» պայքարից դուրս թողեց «Արարատին»՝ 5-4 հաշվով հաղթելով հետխաղյա 11մ հարվածաշարում: 36-րդ րոպեին Աշոտ Քոչարյանը 11մ հարվածով բացել էր հաշիվը, 81-րդ րոպեին Կասիմ Հաջին վերականգնել էր հավասարակշռությունը:

Գավաթի մրցաշարերում «Գանձասարն» ամենամեծ հաջողությանը հասել է 2022/23թթ. խաղարկությունում՝ հասնելով մինչև կիսաեզրափակիչ, որտեղ 0-4 հաշվով պարտվել է ապագա գավաթակիր «Ուրարտուին»: «Գանձասարը» գավաթի մրցաշարերի պատմության մեջ դարձավ Առաջին խմբի միակ թիմը, որը հանդես եկավ կիսաեզրափակչում: 

3. «Գանձասարն» «Արարատի» հետ խաղում շատ մոտ էր առաջնությունում առաջին հաղթանակը տոնելուն, սակայն ավելացված ժամանակում գոլ բաց թողեց՝ բավարարվելով մեկ միավորով:

4. Նախորդ տուրում «Նոան» Գյումրիում մեծ դժվարությամբ 2-1 հաշվով կամային հաղթանակ տարավ «Շիրակի» նկատմամբ, ընդ որում Գոնսալո Գրեգորիոն երկու անգամ չկարողացավ հաղթող դուրս գալ Դարկո Վուկաշինովիչի հետ մենամարտում՝ չիրացնելով 11մ հարվածները: