«Մանչեսթեր Յունայթեդում» նոր ժամանակաշրջան է սկսվում: Էրիկ տեն Հագի հեռացումից ու Ռուդ վան Նիստելրոյի ժամանակավոր պաշտոնավարումից հետո ակումբի ղեկը ստանձնում է Լիսաբոնի «Սպորտինգի» արդեն նախկին գլխավոր մարզիչ Ռուբեն Ամորիմը: Նա ընդամենը մի քանի օրով է մեծ պորտուգալական ֆուտբոլի գլխավոր աստղից՝ «Մանչեսթեր Յունայթեդի» լեգենդար հարձակվող Կրիշտիանու Ռոնալդուից: Ամորիմը, չնայած մարզչի համար շատ երիտասարդ տարիքին, արդեն մեծ նվաճումների է հասել իր հարազատ երկրում: Այժմ դրանք ֆուտբոլի հայրենիք տեղափոխելու ժամանակն է:
FastNews-ը ներկայացնում է «Մանչեսթեր Յունայթեդի» նոր մարզչին, նրա ֆուտբոլային գաղափարները, մտքերն ու այն, թե ինչ կարող են սպասել ակումբի երկրպագուները Ռուբեն Ամորիմից:
Հստակ գաղափար՝ թիմ
Ռուբեն Ամորիմը 2016 թվականին է ավարտել ֆուտբոլիստի կարիերան: Նա Պորտուգալիայում հեղինակավոր ակումբներում է հանդես եկել, ինչպիսիք են «Բենֆիկան» ու «Բրագան»: Ամորիմը 14 խաղի է մասնակցել Պորտուգալիայի հավաքականի կազմում: Բայց այս ամենով հանդերձ դժվար թե ֆուտբոլասերները հիշեն նրան այն ժամանակներից, երբ նա ֆուտբոլիստ էր: Նախկին կիսապաշտպանը միշտ թիմային խաղացող է եղել, չի առանձնացել մյուսներից ու այդ գաղափարն իր հետ է պահում մինչև օրս:
Ամորիմի մարզչական գործունեության առանցքը ևս թիմի գաղափարն է: Նա հավատացած է, որ երբ թիմը, միասնությունը առաջին պլան են գալիս, հաջողություններն անխուսափելի են.
«Իմ գաղափարախոսությունը մեկ բառով հետևյալն է. թիմ: Ամենակարևն ինձ համար թիմի գաղափարն է: Երբ թիմի գաղափարն առաջնային է բոլորի համար, այդ ժամանակ յուրաքանչյուր ֆուտբոլիստ կարողանում է առավելագույնս ցուցադրել իր տաղանդը»,- ասում է Ամորիմը:
Պորտուգալական արահետներով դեպի Մանչեսթեր
Ռուբեն Ամորիմը ֆուտբոլիստի կարիերայի ավարտից հետո Լիսաբոնում դասընթացներ սկսեց մարզչական «Պրո» արտոնագիր ստանալու ու գործունեություն սկսելու համար: Խորհրդանշական է, որ հենց այդ ժամանակ նա մեկ շաբաթ փորձաշրջան անցավ «Մանչեսթեր Յունայթեդում», որը գլխավորում էր Ժոզե Մոուրինյուն:
Ամորիմի՝ որպես գլխավոր մարզիչ, առաջին աշխատավայրը եղել է Պորտուգալիայի երրորդ դիվիզիոնի «Կասա Պիա» ակումբը: Այնտեղ մեկ տարի աշխատելուց հետո Ամորիմին հրավիրեցին «Բրագա»: Այդ մրցաշրջանի արդյունքում մարզիչը «Բրագայի» հետ առաջին տիտղոսը նվաճեց 2013 թվականից հետո՝ հաղթելով Լիգայի գավաթը:
«Բրագիստաների» հետ տպավորիչ մրցաշրջան անցկացնելուց հետո Ամորիմին նկատեց ու հրավիրեց լիսաբոնյան թիմերից մեկը, բայց ոչ թե հարազատ «Բենֆիկան», այլ «Սպորտինգը»: Հրաժարվելը դժվար էր: Ամորիմը դարձավ «Առյուծների» գլխավոր մարզիչ ու 21-րդ դարում ակումբի լավագույն ժամանակաշրջանը կերտեց: «Սպորտինգը» նրա գլխավորությամբ հենց առաջին մրցաշրջանում 19 տարվա դադարից հետո դարձավ Պորտուգալիայի չեմպիոն:
Ամորիմը պաշտոնավարման 4 մրցաշրջաններում «Սպորտինգի» հետ երկու անգամ դարձավ Պորտուգալիայի չեմպիոն ու հիմք դրեց երրորդ չեմպիոնությանը «Մանչեսթեր Յունայթեդ» տեղափոխվելուց առաջ: 5 տիտղոս Լիսաբոնում, տպավորիչ մեկնարկ այս մրցաշրջանում թե՛ ներքին առաջնությունում, թե՛ Չեմպիոնների լիգայում: Բայց այսքանով Ամորիմի ժամանակը Պորտուգալիայում ավարտվեց, Մանչեսթերն է կանչում:
Ամորիմի սխեման ու դրա յուրօրինակ նախապատմությունը
Ռուբեն Ամորիմը նախընտրում է 3-4-3 դասավորությունը: Այս ընտրությունը հետաքրքիր նախապատմություն ունի: Իր առաջին աշխատավայրում՝ «Կասա Պիայում», Ամորիմը պարտվում է առաջին երկու խաղերը: Այդ մրցավեճերում նա 4 պաշտպանով սխեմա էր կիրառել: Երրորդ խաղից առաջ երիտասարդ մասնագետը հանդես է գալիս հայտարարությամբ. «Եթե վաղը նորից պարտվենք, ես հրաժարական կտամ: Ես կփոխեմ որոշ բաներ»։
Սա թերևս նրա մարզչական կարիերայի ամենաբեկումնային դրվագն էր: Երրոդ խաղում «Կասա Պիան» հաղթեց՝ խաղալով փոփոխված սխեմայով՝ 3-4-3: Ամորիմի թիմերն այդ խաղից հետո մինչև օրս խաղում են այդպես: Ահա, թե ինչ ազդեցություն կարող է թողնել որևէ պահի կայացրած էքսպերիմենտալ որոշումը:
Ամորիմը նախընտրում է խաղալ բարձր պրեսինգով, հանդիպման մեծ մասում վերահսկել գնդակը: Նրա թիմերում խաղում են երկու հենակետայիններ, որոնք հաճախ են փոխօգնության գալիս լատերալներին: Վերջիններիս դերը պրեսինգի ու գրոհի ժամանակ շատ կարևոր է: Այնպես որ, նրանք հաճախ կարող են բաց թողնել թիկունքը: Հենակետայիններն այդ դեպքում կարող են ապահովագրել եզրերը:
Ամորիմի թիմերը գիտեն՝ ինչպես պաշտպանվել: 3-4-3-ը շատ արագ կարող է վերածվել 5-2-3-ի, եթե կարիք կա կոմպակտ պաշտպանության: «Մանչեսթեր Յունայթեդի» երկրպագուներն անհանգստացած են, քանի որ պորտուգալացու գաղափարներն ընդհանրապես կապ չունեն այն ամենի հետ, ինչ տարիներ շարունակ արել է «Յունայթեդը»: Էրիկ տեն Հագի օրոք «Մանկունյանցիները» հիմնականում խաղում էին 4-2-3-1 սխեմայով: Ի դեպ, անգլիական լրատվամիջոցների պնդմամբ՝ հենց սխեմայի մեծ տարբերության պատճառով Ամորիմից ամիսներ առաջ հրաժարվեց «Լիվերպուլը»:
10-րդ մարզիչը Սըր Ալեքս Ֆերգյուսոնից հետո
Ռուբեն Ամորիմը Սըր Ալեքս Ֆերգյուսոնի հեռանալուց հետո «Մանչեսթեր Յունայթեդի» 10-րդ մարզիչն է: «Մանչեսթեր Յունայթեդի» երկրպագուները լիահույս են, որ գոնե այս փոփոխությունը դրական կազդի ու ակումբը կվերադառնա այնտեղ, որտեղ պետք է լինի.
««Մանչեսթեր Յունայթեդը» Անգլիայի մեծագույն ակումբն է, թեպետ վաղուց չի հաղթել Պրեմիեր լիգան: Այդ հաղթանակներն անցյալում են, ոչ թե ներկայում: Մեր նպատակն է ներկայում գրանցել նման հաջողություններ»,- ասում է Ամորիմը:
Այս նշանակման մեջ կան նույն ռիսկերը, ինչ Էրիկ տեն Հագի պարագայում: Ամորիմն ուժեղ մարզիչ է, սակայն ապացուցել է իր կարգը միայն Պորտուգալիայի առաջնությունում: Տեն Հագը նույնն էր արել Նիդերլանդների առաջնությունում ու ավելին՝ նրա թիմը՝ «Այաքսը», շատ մոտ էր Չեմպիոնների լիգայի եզրափակիչ հասնելուն:
Մյուս կողմից Ամորիմն ավելի երիտասարդ է ու նպատակասլաց: Մինչև մրցաշրջանի մեկնարկը նա համաձայնության չի հասել «Լիվերպուլի» ու «Վեսթ Հեմի» հետ: Նույնիսկ հասցրեց «Սպորտինգի» երկրպագուներից ներողություն խնդրել Լոնդոն մեկնելու ու «Մրճահարների» հետ բանակցելու համար: Ակնհայտ է, որ Ամորիմը նպատակ ուներ աշխատելու Անգլիայում ու ցույց տալու իր ներուժն այս առաջնությունում: Դա անելու համար «Մանչեսթեր Յունայթեդն» այժմ լավագույն վայրն է ֆուտբոլային Եվրոպայում:
