Հայտնի դարձան ֆուտբոլի Հայաստանի գավաթի կիսաեզրափակչի մասնակիցները: Պատվավոր մրցանակի համար պայքարը կշարունակեն «Փյունիկը», գործող գավաթակիր «Արարատ-Արմենիան», «Վանը» և «Նոան»: Կիսաեզրափակչի զույգերը հայտնի կդառնան այսօր ժամը 19:30-ին Fast Sports-ի ուղիղ եթերում կայանալիք վիճակահանության ժամանակ:

FastNews-ը գավաթի քառորդ եզրափակչի պատասխան հանդիպումների ամենաուշագրավ իրադարձությունները ներկայացնում է 10 փաստի տեսքով:

1. Կայացած 4 հանդիպումներում դաշտի տերերն ու հյուրերը 2-ական հաղթանակ տոնեցին: Ընդ որում կիսաեզրափակիչ մտած բոլոր 4 թիմերն էլ մրցակիցներին հաղթեցին դիմակայության երկու հանդիպումներում էլ: Գավաթի ընթացիկ խաղարկությունում կայացած 20 հանդիպումներից 8-ում հաղթել են դաշտի տերերը, 11-ում հաջողությունն ուղեկցել է հյուրերին, մեկ խաղում էլ գրանցվել է ոչ-ոքի:

Կայացած 4 հանդիպումներում խփվեց 19 գոլ (միջինը մեկ խաղում՝ 4,75 գոլ): Գավաթի ընթացիկ խաղարկության 20 հանդիպումներում արդեն գրանցվել է 84 գոլ (միջինը մեկ խաղում՝ 4,2 գոլ):

2. «Փյունիկը» գավաթի քառորդ եզրափակչի պատասխան խաղում էլ խոշոր հաշվով հաղթեց «Լեռնային Արցախին»: Երկու հանդիպումներում փյունիկցիները մրցակցի դարպասը 12 գոլ խփեցին, որից 5-ը գրանցվեց Թեմուր Ջիկիայի օգտին: Վերջինս դարձավ «Լեռնային Արցախի» հետ գավաթային դիմակայությունում «Փյունիկի» լավագույն ռմբարկուն: Գործող չեմպիոնը 3-րդ տարին անընդմեջ կիսաեզրափակչի ուղեգիր նվաճեց:

3. «Արարատ-Արմենիան» 2-րդ տարին անընդմեջ հաջողությամբ հաղթահարեց քառորդ եզրափակչի արգելքը՝ կրկին հաղթելով «Ուրարտուին»: Գործող գավաթակիրը պատվավոր մրցանակի մրցաշարերում արդեն 6 խաղ անպարտելի է՝ տոնելով 5 հաղթանակ, մեկ խաղ ավարտելով ոչ-ոքի: Վերջին պարտությունն «Արարատ-Արմենիան» կրել է «Ուրարտուից» գավաթի 2022/23թթ. խաղարկության քառորդ եզրափակչում՝ 2022թ. նոյեմբերի 26-ին սեփական դաշտում զիջելով 0-4 հաշվով:

4. «Ուրարտուն» 2-րդ տարին անընդմեջ գավաթի մրցաշարում զիջեց «Արարատ-Արմենիային»՝ պարտվելով դիմակայության երկու խաղերում էլ՝ 0-1, 1-2: Հիշեցնենք, որ գավաթի նախորդ խաղարկության եզրափակչում էլ Դմիտրի Գունկոյի գլխավորած թիմը հետխաղյա 11մ հարվածաշարում 3-5 հաշվով պարտվել էր «Արարատ-Արմենիային» (հիմնական և լրացուցիչ ժամանակում հաշիվը 1-1 էր):

Գավաթի վերջին 12 խաղարկություններում «Ուրարտուն» 2-րդ անգամ չկարողացավ կիսաեզրափակչի ուղեգիր նվաճել: Նախորդ անգամ դա տեղի էր ունեցել 2020/21թթ. մրցաշարում, որում «Ուրարտուն» քառորդ եզրափակչում երկու խաղերի ընդհանուր արդյունքով զիջել էր «Նոային» (0-2, 2-2): Ընդհանուր առմամբ, «Ուրարտուին» 22 անգամ է հաջողվել հաղթահարել քառորդ եզրափակիչ փուլի արգելքը:

5. «Նոան» 4 անպատասխան գնդակ խփելով «Գանձասարի» դարպասը, թիմի պատմության մեջ գավաթի մրցաշարերում ամենախոշոր հաշվով հաղթանակը տոնեց: Մինչև այդ ամենախոշորը քառորդ եզրափակչի առաջին խաղում կապանցիների նկատմամբ 3-0 հաշվով տարած հաղթանակն էր:

Ռուի Մոտայի գլխավորած թիմը գավաթի ընթացիկ խաղարկությունում 3-րդ անընդմեջ հաղթանակը տոնեց: «Նոան» գավաթի ընթացիկ մրցաշարի միակ թիմն է, որ գոլ բաց չի թողել: Գավաթի մրցաշարերին 8-րդ անգամ մասնակցող «Նոան» 3-րդ անգամ կիսաեզրափակչի ուղեգիր նվաճեց: Նախկինում թիմը նման հաջողության էր հասել 2019/20 և 2020/21թթ. խաղարկություններում:

6. Գավաթի ընթացիկ խաղարկությունում «Վանը» 4-րդ անընդմեջ հաղթանակը տարավ: Հետաքրքիր է, որ բոլոր խաղերում էլ Վահե Գևորգյանի գլխավորած թիմը 3 գնդակ է ուղարկել մրցակիցների դարպասը: «Վեստ Արմենիայի» հետ խաղում չարենցավանյան ակումբը գավաթի ընթացիկ մրցաշարում առաջին գոլերը բաց թողեց:

«Վանը» կրկնեց գավաթի մրցաշարերում իր լավագույն արդյունքը՝ 2-րդ անգամ կիսաեզրափակչի ուղեգիր նվաճելով: Առաջին անգամ դա թիմին հաջողվել էր 2021/22թթ. խաղարկությունում:

7. Թեմուր Ջիկիան դարձավ Հայաստանի գավաթի ընթացիկ խաղարկությունում հեթ-տրիկ ձևակերպած 2-րդ ֆուտբոլիստը: Առաջինը «Սյունիքի» հարձակվող Արտեմ Հարությունյանն էր, որը նախնական փուլում 3 անգամ գրավել էր «Նիկարմի» դարպասը: Վերջինս մրցակցին զիջել էր 0-11 հաշվով:

Թեմուր Ջիկիան 5 գոլով գլխավորեց գավաթի ընթացիկ խաղարկության լավագույն ռմբարկուների ցանկը՝ մեկ գնդակով գերազանցելով Արտեմ Հարությունյանին: Ջիկիայի ցուցանիշը լավագույնն է փյունիկցիների շրջանում գավաթի վերջին 10 խաղարկություններում: Մինչև այդ գավաթի մեկ մրցաշարում փյունիկցիներից առավել արդյունավետ էր գործել Սեսար Ռոմերոն, որը 2014/15թթ. խաղարկությունում 5 գոլ էր խփել: Իսկ մեկ մրցաշարի ռեկորդակիրն Արման Քարամյանն է, որը 2002թ. մրցաշարում 9 գոլի հեղինակ է դարձել:

8. Խուան Օբրեգոնը («Լեռնային Արցախ»), Ալվին Թերան («Արարատ-Արմենիա»), Դմիտրի Տիխին («Ուրարտու»), «Վանի» ֆուտբոլիստներ Լևոն Վարդանյանն ու Մալիկ Օդեյինկան, Մարտին Գրիգորյանը («Վեստ Արմենիա») և «Նոայի» խաղացողներ Զավեն Խուդավերդյանն ու էրալդ Չինարին բացեցին գոլերի հաշիվը գավաթի մրցաշարերում: 

Զավեն Խուդավերդյանը դարձավ Հայաստանի գավաթի խաղարկություններում «Նոայում» գոլ խփած ամենաերիտասարդ ֆուտբոլիստը՝ «Գանձասարի» դարպասը գրավելով 17 տարեկան 291 օրականում:

9. Էդգար Մալաքյանը հայկական ակումբներում և Հայաստանի երիտասարդական հավաքականում անցկացրած հանդիպումներում հոբելյանական՝ 50-րդ գոլը խփեց: Հայաստանի գավաթի խաղարկություններում «Լեռնային Արցախի» դարպասը խփած գոլը 8-րդն էր, որից 4-ը նրա հաշվին գրանցվել է «Փյունիկում» խաղալիս:

10. Գավաթի քառորդ եզրափակչի պատասխան հանդիպումներում 3 ինքնագոլ գրանցվեց, որոնց հեղինակներ դարձան Գոռ Հակոբյանը («Լեռնային Արցախ»), Յարոսլավ Մատյուխինը («Վան») և Ալեքսանդր Պուսկոն («Ուրարտու»):