Իտալական խոհանոցն աշխարհում ամենահայտնի ու սիրելիներից է: Իտալական ուտեսնտներից շատերը բավական պարզ են ու եթե ճիշտ ընտրեք բաղադրիչները, կստանաք իտալական համ ու հաճույք:
1. Ապուր մինեստրոնե
Այս ապուրը Իտալիայում շատ հայտնի է: Այն պատրաստում են և՛ հյուսիսում, և՛ հարավում՝ ամենուր:
Թեթև ապուր սեզոնային բանջարեղեններով. կոնկրետ բաղադրատոմս իրականում չկա, ամեն մեկն ավելացնում է այն բանջարեղենները, որ այդ պահին ունի ձեռքի տակ: Եփված սուպի կեսը հարիչով մանրացվում է, դառնում պյուրե, խառնվում չմանրացված մասին. այսպիսով ստացվում է խիտ և շատ համեղ ու օգտակար ապուր: Ոմանք ապուրին ավելացնում են նաև բրինձ կամ մակարոն, ոմանք էլ այն ուտում են քերած պարմեզանով կամ պեստո սոուսով:
2. Աղցան կապրեզե
Կապրեզեն վերջերս հաճախ են պատրաստում նաև Հայաստանում: Այն իտալական խոհանոցի ամենահայտնի ու հեշտ աղցաններից է. լոլիկ, մոցարելա, ձիթայուղ, ռեհան, պեստո մածուկ, որը ևս ռեհանից է պատրաստվում:
Աղցանն անվանումը ստացել է Կապրի կղզուց, որն էլ համարվում է այս ճաշատեսակի հայրենիքը:
3. Բրուսկետա
Նախուտեստ, որը ևս վերջերս բավական հայտնի է դարձել մեզանում: «Բրուսկետա» իտալերենից թարգմանած նշանակում է «տապակել ածուխի վրա»: Իտալիայում այն պատրաստվում է չիաբատա տեսակի սպիտակ հացով. դուք կարող եք փափուկ ու թեթև այլ հացով էլ պատրաստել: Հացի կտորները պետք է տաքացնել ու չորացնել կա՛մ հենց ածուխի վրա, կա՛մ ջեռոցում՝ նախապես սխտորով և ձիթայուղով համեմելուց հետո: Տաքացած հացի վրա դնում են խոզապուխտ, մոցարելա, կտրատած լոլիկ, ձիթապտուղ:
4. Կանելոնի
Կանելոնին պաստայի տեսակներից է. լայն, 2-3 սմ տրամագիծ և մոտ 10 սմ երկարություն ունեցող խողովակներ, որոնք նախատեսված են լցոնվելու համար: Դրանք նախ խաշում են, ապա լցոնում մսով, կամ՝ միայն պանրով, կաթնաշոռով, սպանախով. ընտրեք ինքներդ, ապա տեղավորում են տարրայի մեջ, վրան իհարկե պանիր քերում, կամ լոլիկի սոուս և շարունակում եփել ջեռոցում: Ի դեպ, կան նաև կանելոնիի տեակներ, որոնք նախապես եփելու կարիք չկա:
5. Ֆրիտատա
Սա ձվաձեղի իտալական տարբերակն է: Այն պատրաստվում է բազմազան մթերքներով. պանիր, բանջարեղեն, խոզապուխտ, միս… Մի խոսքով ամենատարբեր մթերքներ ու ձու. ահա ֆրիտատան: Միակ գաղտնիքը, որ ֆրիտատայի մեջ շատ հեղուկ պարունակող մթերքներ պետք չէ ավելացնել, այն նախ տապակեք կրակի վրա, ապա եփեք ջեռոցում: Այդպես պանիրը ավելի լավ է հալվում՝ ֆրիտատային համեղ կեղև ապահովելով:
