Ճապոնիայի ձգողությունը, անկրկնելի հմայքն ու գրավչությունը մեծապես կապված է նաև երկրի խորհրդանիշ սակուրա ծառի հետ: Vnews-ը հավաքագրել է հետաքրքիր փաստեր այդ սպիտակավարդագույն հրաշքի մասին:
Ծառը
Սակուրան Ճապոնիայի խորհրդանիշն է: Գոյություն ունի այս ծառի մոտ 16 տեսակ և շուրջ 400 տիպ: Ամենատարածվածները «սոմեյոշինո» և «սիդառեզակուռա» տեսակներն են, որոնցից առաջինը ծաղկում է սպիտակ, իսկ երկրորդը՝ վարդագույն ծաղիկներով: Ասում են՝ ամենագեղեցիկ սակուրան ծաղկում է Ճապոնիայի հին մայրաքաղաքներում՝ Կիոտո, Նառա և Կամակուռա քաղաքներում: Հաճախ սակուրան թարգմանում են որպես բալենի. հետաքրքիրն այն է, որ սակուրան անպտուղ ծառ է:
Սակուրայի լեգենդը
Գոյություն ունի մի լեգենդ, որը պատմում է այն մասին, թե ինչպես է սակուրան արտացոլում մարդու կյանքի բուն էությունը: Օրերից մի օր Նինիգի անունով մի աստված հյուրընկալում էր սարի աստծո երկու դուստրերին: Նրանցից մեկին Նինիգին պիտի կնության առներ: Քույրերից փոքրին անունը Ծաղկող էր, արտաքնապես նա նույնպես գարուն էր հիշեցնում՝ իր թարմությամբ, նրբությամբ ու գեղեցկությամբ: Իսկ ավագ քույրը թեև շքեղ էր, բայց կոպիտ ու խիստ դիմագծեր ուներ:
Նինիգին սիրահարվեց կրտսեր քրոջն ու ցանկացավ հենց նրան կնության առնել, իսկ ավագ քրոջն ամոթանք տալով ուղարկեց հայրական տուն: Սարերի զայրացած աստվածը խոստացավ երիտասարդ փեսացուին, որ նրանց կյանքը վառ ու անմոռանալի կլինի, սակայն նույնքան կարճատև, որքան սակուրայի ծաղկման շրջանը: Հենց այդ օրվանից էլ երկրի վրա հայտնվեցին հասարակ մահկանացուները, որոնք օժտված էին ընդամենը մի քանի տասնամյակ տևող կյանքով… իսկ եթե Նինիգին ընտրեր ավագ քրոջը, նրա կյանքը կտևեր մի ամբողջ հավերժություն:
Տոնակատարությունը
Ամեն տարի օդերևութաբանները հետևում են սակուրայի ծաղկման շրջանի սկսվելուն և հայտնում այդ մասին. այն յուրատեսակ պետական նաշանակություն ունեցող իրադարձություն է համարվում: Գարունը սակուրայի ծաղկման շրջանն է, որի հետ կապված է Ծագող Արևի Երկրի ամենագունեղ տոներից մեկը: Մարտի վերջից մինչ ապրիլի ակիզբը Ճապոնիան ամբողջությամբ վերափոխվում է՝ հարյուրավոր ծառեր ծաղկում են սպիտակ և սպիտակավարդագույն ծաղիկներով, ինչի արդյունքում հեռվից թվում է, թե ծառերը ծածկված են ամպերով կամ էլ ձյան փաթիլներով: Ամեն տարի բազմաթիվ մարդիկ հավաքվում են պալատների և վանքերի այգիներում, զբոսայգիներում ու արահետներում՝ հիանալու այս հրաշալի տեսարանով: Այս սովորույթը ստացել է «հանամի» անվանումը , որը բառացիորեն նշանակում է «ծաղիկների դիտում»:
Կրոն
Սակուրայի ծաղկումը, ինչպես նշեցինք, շատ կարճատև է: Ընդամենը անձրևից կամ քամուց այս զարմանահրաշ ծառի նուրբ ծաղիկները դեռևս չբացված կարող են թափվել: Գուցե հենց դա է պատճառը, որ բուդդիզմում սակուրան համարվում է կյանքի անցողիկության խորհրդանիշը, խորհրդանշում է նաև անցած երիտասարդությունն ու սերը:
Խոհանոցում
Սակուրայի ծաղկման ողջ շրջանը խորհրդանշվում է նաև խանութներում և փողոցային շուկաներում նոր ուտելիքների առկայությամբ: Այսպես կոչվող «գարնան համը» իր տարբեր արտահայտչամիջոցներն է գտնում տեղի խոհանոցում. ամենատարածված ուտեստն է բրինձից պատրաստված փոքրիկ թխվածքը, որը փաթաթված է սակուրայի տերևներով: Ճապոնացիների խոհանոցներում կարելի է նաև հանդիպել սակուրայի տերևների, որոնք օգտագործվում են իբրև համեմունքներ, կամ թեյի հավելումներ:
