«Նոան» Հայաստանի չեմպիոնի տիտղոսը նվաճած 10-րդ ակումբն է

Fastex Պրեմիեր լիգայի 30-րդ տուրում ոսկե մեդալների համար մղված պայքարը հանգուցալուծվեց: Աբովյանում 2-1 հաշվով հաղթելով «Փյունիկին», «Նոան» առաջնության ավարտից 3 տուր առաջ պաշտոնապես գրանցեց իր չեմպիոնությունը և ակումբի կարճատև պատմության մեջ առաջին անգամ արժանացավ ոսկե մեդալների: Հատկանշական է, որ Ռուի Մոտայի գլխավորած թիմը ուժեղագույնը ճանաչվեց նախորդ առաջնության չեմպիոնին հաղթելու շնորհիվ: «Նոան» Հայաստանի առաջնությունների 33-ամյա պատմության մեջ չեմպիոնի տիտղոսը նվաճած 10-րդ ակումբն է:

Ռուի Մոտայի գլխավորած թիմը ցուցադրած արդյունավետ խաղով, ֆուտբոլիստների վարպետությամբ ու խաղային ունակություններով գերազանցեց չեմպիոնական մրցավազքում իր մրցակիցներին և արժանիորեն նվաճեց չեմպիոնի տիտղոսը, որի առթիվ շնորհավորում ենք ֆուտբոլային կոլեկտիվի բոլոր անդամներին, ակումբի ղեկավարությանն ու թիմի երկրպագուներին:

«Նոայի» ներկայիս կազմի ֆուտբոլիստներից Հայաստանի առաջնություններում նվաճած ոսկե մեդալների քանակով ամենատիտղոսակիրն Արտակ Դաշյանն է: Նա դարձավ Հայաստանի հնգակի չեմպիոն: Չեմպիոնական իր առաջին երկու տիտղոսները Դաշյանը նվաճել է «Ալաշկերտում» (2016/17, 2017/18թթ.), հետագայում երկու անգամ չեմպիոն է հռչակվել «Փյունիկում» (2021/22, 2023/24թթ.):

Օգնյեն Չանչարևիչն ու Արտյոմ Ավանեսյանը դարձան Հայաստանի եռակի չեմպիոններ: Սերբ դարպասապահն իր առաջին երկու տիտղոսները նվաճել էր «Ալաշկերտում» (2017/18, 2020/21թթ.), իսկ Ավանեսյանը չեմպիոն էր դարձել «Արարատ-Արմենիայում» (2018/19, 2019/20թթ.):

Հովհաննես Համբարձումյանն ու Խամես Սանթոսն էլ 2-րդ անգամ վայելեցին չեմպիոնության բերկրանքը: Համբարձումյանն իր առաջին ոսկե մեդալը նվաճել էր «Բանանցում» 2013/14թթ. առաջնությունում, իսկ Սանթոսը չեմպիոն էր դարձել «Փյունիկում» նախորդ մրցաշրջանում:

«Փյունիկի» ռեկորդն անսասան մնաց

Չեմպիոնության վաղաժամ գրանցման «Նոայի» այս ցուցանիշը լավագույնն է Հայաստանի վերջին 18 առաջնություններում՝ սկսած 2007թ.: Իսկ ռեկորդային ցուցանիշը պատկանում է «Փյունիկին», որին հաջողվել է բոլորից արագ, առաջնության ավարտից 5 տուր առաջ անհասանելի դառնալ մրցակիցների համար ու գրանցել չեմպիոնությունը:

Դա տեղի է ունեցել 2004թ. առաջնությունում: Այդ տարի «Փյունիկը» Վարդան Մինասյանի գլխավորությամբ, որը 9-րդ տուրում էր ստանձնել թիմի ղեկը՝ փոխարինելով Միխայ Ստոյկիցային, ռեկորդային՝ 16 անընդմեջ հաղթանակ տոնելով, ժամկետից շուտ չեմպիոն հռչակվեց: Մրցաշարային ամփոփիչ աղյուսակում փյունիկցիները 16 միավորով գերազանցեցին 2-րդ տեղը զբաղեցրած «Միկային»:

2006թ. էլ միավորների այդ ռեկորդային տարբերությունը գրանցվեց երկրի չեմպիոն «Փյունիկի» և արծաթե մրցանակակիր «Բանանցի» միջև:

Հետաքրքիր դեպք տեղի ունեցավ 2014/15թթ. առաջնությունում: Մրցաշարի ավարտից 2 տուր առաջ «Փյունիկը» «Բանանցի» հետ հանդիպմանը խաղադաշտ դուրս եկավ արդեն չեմպիոնի կարգավիճակով, քանի որ նախօրեին փյունիկցիների գլխավոր մրցակիցներ «Ուլիսն» ու «Շիրակը» 2-ական միավոր կորցնելով, անհասանելի էին դարձել առաջատարի համար: «Փյունիկը» նորընծա չեմպիոնի կարգավիճակով իր առաջին խաղում 1-2 հաշվով պարտություն կրեց:

Հայաստանի նախորդ 9 առաջնություններում բավական թեժ մրցակցություն էր ծավալվել չեմպիոնի տիտղոսի համար: Դրանցից 6-ում չեմպիոնը որոշվել էր միայն ավարտական տուրում, մյուս 3 մրցաշրջաններում չեմպիոնությունը գրանցվել էր առաջնության ավարտից մեկ տուր առաջ:

Չեմպիոն հռչակվելու «Նոայի» 4-րդ փորձը հաջողությամբ ավարտվեց

2018/19թթ. մրցաշրջանից Հայաստանի Բարձրագույն խմբի առաջնություններին մասնակցող «Նոան» նախկինում 3 անգամ մոտ է եղել չեմպիոնական տիտղոսին, սակայն ի վերջո ստիպված է եղել բավարարվել արծաթե մեդալներով:
2019/20թթ. առաջնությունում Իգոր Պիկուշչակի գլխավորությամբ «Նոան» հավակնում էր ոսկե մեդալներին:

Առաջնության ավարտից երկու տուր առաջ «Նոան» ընդամենը մեկ միավոր էր զիջում առաջատարներ «Շիրակին» և «Արարատ-Արմենիային»: 27-րդ տուրում «Նոան» սեփական դաշտում 4 անպատասխան գնդակ ուղարկեց «Շիրակի» դարպասը, իսկ «Արարատ-Արմենիան» նվազագույն հաշվով հաղթեց «Արարատին»:

Ոսկե մեդալների բախտը վճռվեց ավարտական տուրում «Արարատ-Արմենիայի» և «Նոայի» մրցավեճում, որում գործող չեմպիոնը Ֆուրջել Նարսինգի և Յուսուֆ Օտուբանջոյի խփած գոլերի շնորհիվ հաղթեց ու 2-րդ տարին անընդմեջ արժանացավ ոսկե մեդալներին:

Հաջորդ մրցաշրջանում «Նոան» Դմիտրի Գունկոյի գլխավորությամբ առաջնության ավարտից 2 տուր առաջ 41 միավորով գլխավորում էր աղյուսակը՝ 4 միավորով գերազանցելով իրենից 2 խաղ պակաս անցկացրած «Ալաշկերտին»: Սակայն ավարտական երկու խաղերում էլ «Նոան» պարտվեց «Ուրարտուին» (0-1) և «Վանին» (1-2), իսկ «Ալաշկերտը» 4 խաղում 9 միավոր վաստակեց ու նվաճեց չեմպիոնի տիտղոսը:

Նախորդ առաջնությունում էլ չեմպիոնական մրցավազքում «Նոայի» համար բախտորոշ եղավ նախավերջին տուրում ոսկե մեդալների հավակնորդ «Փյունիկից» արտագնա խաղում 0-3 հաշվով կրած պարտությունը:

Այդ հանդիպմանը «Նոան» Կառլոս Ինարեխոսի գլխավորությամբ ներկայացել էր առաջատարի դերում՝ մեկ միավորով գերազանցելով «Փյունիկին»: Վերջինս հաղթանակի շնորհիվ շրջանցեց «Նոային» և ավարտական տուրում Գյումրիում նվազագույն հաշվով պարտության մատնելով «Շիրակին», չեմպիոն հռչակվեց:

Նախորդ առաջնություններից 14-ում է ոսկե մեդալների դափնեկիրը որոշվել ավարտական տուրում, ընդ որում 2008թ. չեմպիոնին որոշելու համար նույնիսկ հարկ է եղել անցկացնել լրացուցիչ`«ոսկե» խաղ «Փյունիկի» և «Արարատի» միջև: Իսկ ահա 19 անգամ ՀՀ չեմպիոնն ի հայտ է եկել ժամկետից շուտ:

Նշենք, որ 26 անգամ թիմերն իրենց չեմպիոնությունը պաշտոնապես գրանցել են Երևանում կայացած խաղում, 3 անգամ չեմպիոնն օծվել է Գյումրիում, 2-ական անգամ՝ Արարատում և Աբովյանում, մեկ անգամ էլ չեմպիոնական խաղը կայացել է Արմավիրում:

Ստորև ներկայացվող աղյուսակում բերված են տվյալներ, թե տարբեր տարիներին թիմերը որ խաղում, առաջնության ավարտից քանի տուր առաջ են պաշտոնապես չեմպիոն հռչակվել.

Թվական	Չեմպիոն	Չեմպիոնական խաղ	Հաշիվ	Քանի տուր առաջ
1992	ՀՄԸՄ «Շիրակ»	05.11. «Կոտայք» 05.11. «Նաիրի»	3-2 5-0	-  -
1993	«Արարատ»	09.11. «Իմպուլս»	5-0	-
1994	«Շիրակ»	21.10.«Երազանք»	4-0	2
1995/96	«Փյունիկ»	18.5. «Շիրակ»	1-0	1
1996/97	«Փյունիկ»	01.6. ՀՄՄ	5-0	2
1997	«Երևան»	16.11. «Փյունիկ»	1-0	-
1998	«Ցեմենտ»	04.11. «Փյունիկ»	3-1	1
1999	«Շիրակ»	13.12. «Ցեմենտ»	0-0	-
2000	«Արաքս»	16.11. «Դինամո»	+ (3-0)	-
2001	«Փյունիկ»	04.11. «Սպարտակ»	2-1	4
2002	«Փյունիկ»	03.11.«Լեռնագործ»	6-0	2
2003	«Փյունիկ»	08.11. «Դինամո»	5-0	3
2004	«Փյունիկ»	23.10. «Կոտայք»	6-1	5
2005	«Փյունիկ»	06.11. «Կիլիկիա»	4-1	-
2006	«Փյունիկ»	21.10. «Կիլիկիա»	12-1	3
2007	«Փյունիկ»	07.11. «Արարատ»	4-1	1
2008	«Փյունիկ»	19.11. «Արարատ»	2-1	-
2009	«Փյունիկ»	01.11. «Շիրակ»	3-1	1
2010	«Փյունիկ»	14.11. «Կիլիկիա»	1-0	-
2011	«Ուլիս»	22.10. «Արարատ»	2-1	2
2012/13	«Շիրակ»	03.05. «Փյունիկ»	1-0	2
2013/14	«Բանանց»	11.05. «Փյունիկ»	1-0	1
2014/15	«Փյունիկ»	17.05. «Բանանց»	1-2	2
2015/16	«Ալաշկերտ»	22.05. «Միկա»	2-0	-
2016/17	«Ալաշկերտ»	28.05. «Շիրակ»	3-1	1
2017/18	«Ալաշկերտ»	12.05. «Փյունիկ»	0-0	1
2018/19	«Արարատ-Արմենիա»	30.05. «Բանանց»	1-0	-
2019/20	«Արարատ-Արմենիա»	17.07. «Նոա»	2-0	-
2020/21	«Ալաշկերտ»	28.05. «Արարատ-Արմենիա»	1-0	-
2021/22	«Փյունիկ»	30.05. «Ալաշկերտ»	1-1	-
2022/23	«Ուրարտու»	02.06. «Փյունիկ»	1-0	1
2023/24	«Փյունիկ»	25.05. «Շիրակ»	1-0	-
2024/25	«Նոա»	09.05. «Փյունիկ»	2-1	3