Լոնդոնի «Չելսիի» նորեկ, արգենտինացի կիսապաշտպան Էնցո Ֆերնանդեսը նշել է, որ ցանկանում է նոր թիմում հաջողությունների հասնել:
««Չելսին» մեծ ակումբ է, որը միշտ պայքարում է և հաղթել է Չեմպիոնների լիգան: Մենք կփորձենք հասնել մեր առջև դրված նպատակներին և ակումբը բարձրացնել նոր մակարդակի:
Իրոք ուրախ եմ «Չելսի» տեղափոխվելու համար և կանեմ ամեն բան, որ արդարացնեմ սպասելիքները: Տեխնիկապես լավ պատրաստված եմ, լավ եմ հասկանում խաղից, հիանալի դրիբլինգ ու հարվածի տեխնիկա ունեմ:
Ամեն բան կանեմ, որպեսզի օգնեմ թիմակիցներիս և նրանց դարձնեմ ավելի լավը»,- Ֆերնանդեսի խոսքը մեջբերում է The Sun-ը:
Հիշեցնենք, որ 22-ամյա ֆուտբոլիստին ձեռք բերելու համար անգլիական ակումբը Լիսաբոնի «Բենֆիկային» վճարել է 121 միլիոն եվրո` իրականացնելով Պրեմիեր լիգայի պատմության մեջ ամենաթանկարժեք տրանսֆերը։ Կողմերը կնքել են 8 տարվա պայմանագիր, որի ժամկետը կավարտվի 2031 թվականի հունիսի 30-ին: Աշխարհի նորընծա չեմպիոն Արգենտինայի հավաքականի կիսապաշտպանը «Չելսիում» կխաղա «5» համարի մարզաշապիկով:
Էնցո Ֆերնանդեսը 2022-ին արգենտինական «Ռիվեր Փլեյթից» էր տեղափոխվել «Բենֆիկա»։ Ընթացիկ մրցաշրջանում արգենտինացին մասնակցել է 29 հանդիպման, խփել 4 գոլ, կատարել 7 արդյունավետ փոխանցում:
