Իսպանիա - Խորվաթիա Եվրո-2024-ի B խմբի առաջին տուրի խաղում (3-0) ուշագրավ ցուցանիշներ են գրանցվել:
Իսպանիացի հարձակվող Ալվարո Մորատան պատմության առաջին ֆուտբոլիստն է, որը երեք տարբեր Եվրոպայի առաջնություններում գրավել է նույն հավաքականի դարպասը, հայտնում է Gracenote Live-ը: Մադրիդի «Աթլետիկոյի» ֆուտբոլիստը Խորվաթիայի հավաքականին գոլ էր խփել նաև Եվրո-2016-ում և Եվրո-2020-ում: 31-ամյա Մորատան նաև Իսպանիայի հավաքականի պատմության առաջին ֆուտբոլիստն է, որը գոլ է խփում Եվրոպայի երեք առաջնություններում:
Իսպանիայի հավաքականն էլ 16 տարվա մեջ առաջին անգամ պաշտոնական խաղում գնդակին տիրելու առավելություն չի ունեցել (խորվաթների դեմ խաղում եղել է 47% ընդդեմ 53%-ի)։ Ըստ Opta վիճակագրական ռեսուրսի՝ Իսպանիայի հավաքականը նախորդ անգամ գնդակին տիրելու առումով մրցակցին զիջել էր Եվրո-2008-ի եզրափակիչ խաղում: Այդ մրցավեճում իսպանացիները հաղթել էին 1-0 հաշվով և դարձել Եվրոպայի չեմպիոն:
Իսպանացիները նախորդ 136 խաղերում գնդակին տիրելու ցուցանիշով գերազանցել էին մրցակիցներին:
Բիլբաոյի «Աթլետիկի» դարպասապահ Ունայ Սիմոնն էլ դարձավ Եվրո-2024-ի առաջին դարպասապահը, որն անառիկ պահեց դարպասը: Իսպանիայի հավաքականի դարպասապահը չորս սեյվ կատարեց խորվաթների դեմ խաղում, այդ թվում՝ հետ մղեց Զագրեբի «Դինամոյի» հարձակվող Բրունո Պետկովիչի իրացրած 11-մետրանոցը:
Մադրիդի «Ռեալի» պաշտպան Դանի Կարվախալն էլ դարձավ Եվրոպայի առաջնություններում Իսպանիայի հավաքականի պատմության ամենատարեց գոլի հեղինակը: Կարվախալը Խորվաթիայի հավաքականի դարպասը գրավեց 32 տարեկան 156 օրականում: Նրան գոլային փոխանցում կատարած կատալոնական «Բարսելոնայի» վինգեր Լամին Յամալը, ոչ միայն դարձավ Եվրո-ների պատմության ամենաերիտասարդ ֆուտբոլիստը, այլև ամենաերիտասարդ ասիստենտը: